भांगरभूंय | प्रतिनिधी
मुख्यमंत्र्यांनी घेतली महिला पुलिसांची बसका
भांगरभूंय । प्रतिनिधी
पणजी : बायलांचे सुरक्षे खातीर महिला पुलिसांनी बायलां कडेन संवाद सादपा सयत शिक्षण संस्था तशेंच पंचायत वाठारांत जागृताय करची, असो सल्लो मुख्यमंत्री डॉ. प्रमोद सावंत हांणी महिला पुलिसांक दिला. मुख्यमंत्री डॉ. सावंत हांणी बिरेस्तारा महिला पुलिसांची बसका घेतली.
गोंयांत गुन्यावांचें प्रमाण वाडत आसा. बायलांचेर जावपी अत्याचाराचें प्रमाण वाडत आसा. बायलांचेर जावपी अत्याचारांचें प्रमाण उणें करपाच्या हेतान मुख्यमंत्र्यांनी महिला पुलिसांची बसका घेतली. पुलीस म्हासंचालक अलोक कुमार, पुलीस अधिकारी आनी महिला पुलीस बसकेक हाजीर आशिल्लीं. बायलां विशीं गुन्यांवाच्या तपासांत महिला पुलिसांची भुमिका म्हत्वाची थारता. तशेंच अत्याचार जाल्ल्या बायलांक मजत करपांतूय महिला पुलीस बरो वावर करपाक शकतात. महिला पुलिसांनी बायलां सयत समाजा कडलो संवाद वाडोवपाची गरज आसा. भौशीक मळार बायलांनी कशे तरेन जतनाय घेवची आनी कशे तरेन वागचें, हे विशीं मार्गदर्शन करपाक जाय. शाळा, विद्यालयांनी वचून कायदो तशेंच सुरक्षेच्या उपायांचेर जागृताय करपाक जाय. हाका लागून भुरगीं तशेंच विद्यार्थ्यां मदी सादुरताय वाडटली. पंच, नगरसेवक हांचे मजतीन लोकां मदीं जागृताय करपाक जाय. पुलीस स्टेशनाचेर पिडीत बायलांचें समुपदेशन महिला पुलिसांनी करचे, असो सल्लो मुख्यमंत्र्यांनी दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
