भांगरभूंय | प्रतिनिधी
नवरात्र : दुसरी माळ
नवरात्रांचो दुसरो दीस म्हळ्यार द्वितीया. ह्या दिसा दुर्गेचें रूप आशिल्ले देवी ब्रह्मचारिणीची पुजा करतात. हे देवीची आराधना केल्यार जिवीतांत आचार- विचारांचेर संयम येता आनी तो मनीस सदाचारी जाता अशी धर्मीक भावना आसा. ब्रह्मचारिणी देवीच्या दिव्य रुपांत अनंत तेज आसा. उजव्या हातांत जपमाळ, तर तिच्या दाव्या हातांत कमंडलू आसा. हें तिचें तेजोमय रुप पळयल्यार देवी ब्रह्मचारिणी अखंडीत तप करणारी देवी म्हूण दिसून येता. ब्रह्म म्हळ्यार तप, चारिणी म्हळ्यार करणारी म्हूण देवीचें नांव ब्रह्मचारिणी.
देवी ब्रह्मचारिणीच्या जल्मा विशीं पुराणीक कथा आसा. ताचे वेल्यान, कळटा की देवीन फाटल्या जल्मांत पर्वतराज हिमालयाची धूव म्हण जल्म घेतललो तेन्ना नारदमुनीन देवीक देव शंकर घरकार म्हूण जाय जाल्यार कठीण तप करपाक सांगलेलें. ह्याच कठीण तपाक लागून देवीक तपश्चारिणी वा ब्रह्मचारिणी म्हणटात. ह्या तपा उपरांत देवीन तीन हजार वर्सां मेरेन जमनीर पडलेलीं बेलाची पानां खावन दीस काडले. पानां खांवची बंद केल्या उपरांत देवीक ‘अपर्णा’ हें नांव पडलें.
खूब वर्सां तप केल्ल्यान देवी खूब अशक्त जाल्ली. तिची दशा पळोवन आवय खुबूच दुखेस्त जाल्ली. तिका तपांतल्यांत उठोवपाक तिचे आवयन तिका उमा ये उमा नाका उमा नाका असो उलो मारलो. तेन्नाच्यान देवीक उमा हें नांव पडलें. देवीचें तप पळोवन तिनूय लोकांतले सगळे देव आनी देवी तिची तोखणाय करपाक लागल्यो. तिची ही तपस्या पळोवन त्रिलोकांत हाहाकार जालो. निमणे ब्रह्मदेवान आकाशवाणी करून तिका सांगलें, ‘हे देवी इतलें कठीण तप आज मेरेन कोणेच करूंक ना. तुज्या तपाची सगळ्या त्रिलोकांत तोखणाय जाता. तुजी मनांतली इत्सा बेगोबेग पुराय जातली. देव शंकर तुकां बेगीन तुजो घरकार म्हूण फावो जातलो. आतां तप सोडून तूं तुज्या घरा वच. तुजो जावपी घोव तुकां व्हरपाक तुज्या घरा कडेन येतलो.’
तर अशी ही ब्रह्मचारिणी देवीची कथा.
प्रीता परब
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
