भांगरभूंय | प्रतिनिधी
पेडणें: पत्रादेवी हँडब्रेक लावंक नाशिल्ल्यान जाल्ल्या अपघातांत दोन स्कुटरींचो चुरो जालो. पूण जिवीतहानी मात जाली ना. ही घडणूक काल दनपारां तीन वरांच्या सुमाराक पत्रादेवी चेकनाक्यार घडली.
हे विशीं मोपा पुलिसांनी दिल्ले म्हायती प्रमाण काल दनपारां तीन वरांच्या सुमाराक एमपी 04 झेड 3042 मुंबय सावन वास्को म्हाल घेवन वचपी ट्रक पत्रादेवी चेक नाक्यार तपासणी खातीर राविल्लो. चालकान गाडयेचो हँडब्रेक लायनासतना गाडयेंतल्यान देंवून तपासणी नाक्यार गेले उपरांत ट्रक फाटीं देंवूंक लागलो. ट्रकांत म्हाल खूब आशिल्ल्यान आनी देंवती आशिल्ल्यान गाडयेची गती वाडली. त्याच वेळार दुसरी गाडी बांदा सावन पेडणेंचे दिशेन वताली ते गाडयेच्या चालकान गाडी फाटीं येत आशिल्ल्याचें पळयें आनी गाडी कुशीक घेवपाचो यत्न केलो. पूण सदर गाडी येवन पेडण्यां वचपी गाडयेक आदळ्ळी आनी त्या धक्क्यान गाडी नेटान फाटीं आयली आनी रस्त्याचे कुशीक उब्यो करून दवरिल्ल्या एमएच 43 बीपी 1154 आनी एमएच 04 एम 3596 ह्या दोन स्कुटरींचेर आदळ्ळी. गाडी इतले गतीन आयली की दोनूय स्कुटरींचो चुरो जालो. हाका लागून कांय वेळ येरादारी बंद उरली.
थळाव्या पुलिसांनी ताकतिकेन कारवाय करून रस्तो येरादारी खातीर मेकळो करून दिलो आनी अपघात केल्लो ट्रक चालक अहमद लाल उत्तर प्रदेश हाका ताब्यांत घेतलो. मोपा पुलीस स्टेशनाचे निरिक्षक सचीव लोकरे हांच्या मार्गदर्शना खाला हवालदार वायंगणकार फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
