भांगरभूंय | प्रतिनिधी
म्हायती म्हळ्यार शक्त. नागरिकाचें सक्षमीकरण . देखून म्हायतीची सार्वत्रिक उपलब्धताय हें सबळ आनी समावेशक, गिन्यानी समाजाचो एक वेगळावंक येनाशिल्लें आंग.
आंतरराष्ट्रीय म्हायती सार्वत्रिक उपलब्धताय दीस दर वर्सा 28 सप्टेंबराक मनयतात. हालींच तो जालो. संयुक्त राष्ट्र संघटनेचो शाश्वत उदरगत उद्दिश्ट आपणायल्या उपरांत म्हायती मेळोवपाक चालना दिवपाच्या मळार जाल्ली प्रगती मोलावपा खातीर हो एक माची म्हूण काम करता. म्हायती सार्वत्रिक उपलब्धताये खातीर आंतरराष्ट्रीय दीस हो नागरिकाक म्हायती सोदपाचो आनी मेळोवपाचो अधिकार आसा हाची खात्री करपा खातीर जागतीक वचनबद्धताय दाखयता.
नितीवान आधी समानतायेचेर आधारित समाज तयार करपाक, गिन्यान वाडोवपाक आनी शाश्वत उदरगतीक पोसवण दिवपाक नागरिकांक म्हायती मेळप ही एक महत्त्वाची गजाल ह्या जाणविकायेंतल्यान हो दीस मनयतात.
आमच्या देशांत 2005 वर्सा म्हायती हक्क कायदो आयलो. तो एक क्रांतिकारी कायदो. म्हायती आशिल्ले नागरिक माहितीपूर्ण निर्णय घेवंक शकतात, देखीक- वेंचणुकेक मत घालूंक वतना. जेन्ना नागरिकांक आपलें राज्य कशें चलता तें कळटा तेन्नाच तांकां सरकारी निर्णयांक आनी कृती खातीर आपल्या सरकारांक जापसालदार धरूं येता.
म्हायती म्हळ्यार शक्त. नागरिकाचें सक्षमीकरण . देखून म्हायतीची सार्वत्रिक उपलब्धताय हें सबळ आनी समावेशक, गिन्यानी समाजाचो एक वेगळावंक येनाशिल्लें आंग. म्हायतीचो सार्वत्रिक प्रवेश वा उपलब्धता म्हणल्यार दरेकल्याक म्हायती सोदपाचो, मेळोवपाचो आनी दिवपाचो अधिकार आसा. हो हक्क अभिव्यक्ती स्वातंत्र्याच्या हक्काचो एक अभिन्न भाग. लोकांच्या गरजेच्या प्रस्नां विशीं म्हायती दिवपाक प्रसार माध्यमांची म्हत्वाची भुमिका आसता. पूण म्हायती सोदपाचे आनी मेळोवपाचे क्षमतेचेर ती आदारून आसता. देखून सार्वत्रिक म्हायती मेळपाचो हक्क पत्रकारितेच्या स्वातंत्र्याच्या हक्का कडेनय बांदिल आसा हें माध्यमां आनी पत्रकारांनी विसरूंक फावोना.
17 नोव्हेंबर 2015 दिसा संयुक्त राश्ट्रांच्या शिक्षणीक, शास्त्रीय आनी सांस्कृतीक संघटनेन (युनेस्को) 28 सप्टेंबर हो आंतरराष्ट्रीय सार्वत्रिक म्हायती मेळपाचो दीस म्हूण जाहीर केलो.
संवसारांतल्या जायत्या नागरी समाज संघटनांनी आनी सरकारी संस्थांनी हो दीस आपणायला आनी सध्या मनयतात हें मतींत घेवन संयुक्त राष्ट्र संघटनेच्या सार्वत्रिक सभेनय 28 सप्टेंबर 2019 हो आंतरराष्ट्रीय सार्वत्रिक म्हायती मेळपाचो दीस म्हूण आपणायलो.
युनेस्को आनी ताच्यो आंतरसरकारी कार्यावळी – संचारण उदरगती खातीर आंतरराष्ट्रीय कार्यावळ आनी सगळ्यां खातीर म्हायती कार्यावळ – म्हायती मेळोवपाच्या मळार धोरण आनी मार्गदर्शक तत्वां विशीं आंतरराष्ट्रीय चर्चांनी वांटो घेवपाक सगळ्या भागधारकांक एक मंच ह्या दिसा निमतान गावता. तशेंच दोनूय कार्यावळी उक्ते विज्ञान, बहुभाशीकता, दिव्यांग आनी उपेक्षित समाज घटकां खातीर आयसीटी (म्हायती तंत्रज्ञान आधारित प्रवेश सुलभता), आनी माध्यम आनी म्हायती साक्षरताय घटमूट करपाचो हेतू आशिल्ल्या प्रकल्पांच्या विकासा खातीर सकारात्मक वातावरण फुलपाक सक्षम करतात.
म्हायती हक्क कायदो दुबळो करपाचे यत्न सरकारां करीत आसतात. हाचे आड नागरिक आनी मिडियांनी शिटूक आसपाक फावो.
– प्रकाश वा. कामत
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
