भांगरभूंय | प्रतिनिधी
दोन धर्मां मदीं दंगल जातकच नेमकें कितें जाता, ताचो अणभव बऱ्याच भारतीयांक आसा. ताचो खरो धपको बसता तो हातार पोट आशिल्ल्या निश्पाप लोकांक. कांयच चूक नासतना शेंकड्यांनी लोकांक जीव व्हगडावचो पसून पडला. तरीय आमी शाणे जावंक नात. आमचे मदलेच कांय जाण धर्मां मदलो दुस्वास कसो कायम उरतलो हाची जतनाय घेत आसतात. कित्याक? आपल्या संघटणांक, पक्षांक, फुडाऱ्यांक फायदो जावंक जाय म्हूण?? मात अशें केल्ल्यान आमचें शार, गांव, राज्य आनी पर्यायान देश फाटीं उरचो ना? धर्मीक दुस्वासान जाल्ले घावे पेखनात (ते पेखचे न्हय, अशेंय थोड्यांक दिसता आसतलें.) आनी ती तिडक पिळग्यान पिळग्यो रुजवणाक घाल्ल्यान समाजाचेर वायट परिणाम करता. परतून दोना मदलो हो वा तो गट दंगल करता आनी कश्टान उबें केल्लें सगलें- सगलें मातयेभरवण जाता. तेन्ना समाज, देश आनी स्वताक मुखार व्हरपाक जाय जाल्यार एकचार, भावचार, मोग, मायपास काळजांत किल्लतलो हे खातीर दरेकल्यान यत्न करूंक फावो.
फेब्रुवारींत आमचे, सगल्या भारतीयांचे प्रधानमंत्री नरेंद्र मोदी गोंयांत आयिल्ले. तेन्ना तांणी गोंयचो जातीय, धर्मीक एकचार, समाजीक उदरगत ही पुराय देशान देख घे सारकी आसा, अशें म्हणिल्लें. धर्माच्या आदाराचेर समाज फोडपाक सोदपी राजकी पक्षांक गोंयान रोखठोक जाप दिल्या, अशेंय सांगिल्लें. मुख्यमंत्री दो. प्रमोद सावंत हांणीय दोन दिसां पयलीं खंयच्याच धर्माच्या लोकांनी धर्मीक तणाव निर्माण जातलो, अशे कांय करचें न्हय, अशें म्हणलां. मात, आयज चित्र कितें दिश्टी पडटा? पयरच्यान सोशल मिडियाचेर व्हिडियो व्हायरल जाल्यात. तातूंत सेंट फ्रान्सीस झेवियरा विशीं वाकडें उलोवप्यांचेर खर टिका जातना दिसता. कांय कडेन पुलीस कागाळीय जाल्यात. दुसरे वटेनच्यानूच पुलीस कागाळ नोंद जाल्या. आमच्या देशांत प्रत्येकाक आपल्या धर्मा प्रमाण वागपाक, प्रार्थना करपाक संविधानान मान्यताय दिल्या. खरें म्हणल्यार धर्म हो हुंबऱ्या भितर दवरपाक जाय. मात तो भायरूच चड दिसता. कांय जाण ताचो वापर करून दुसऱ्यां विशीं तेढ निर्माण करपाक लागल्यात. ही गजाल समाजविघातक. निदान आमच्या गोंयांत सगल्या धर्माचे लोक एकचारान रावतात. एकमेकांच्या सणा, परबांनी वांटेकार जातात. पूण, हो दुस्वास वाडत गेलो जाल्यार फुडाराक हें चित्र दिसतलेंच, हाची खात्री दिवं नजं.
दरेकल्याक आपलो धर्म, संत, देव, धर्मीक चिन्नां, थळां, म्हापुरूस मोगाचे. ताचेर कोण सादी टिका करीत, दुबाव घेत जाल्यार पसून भावना, श्रद्धा दुखावतात. फाटीं दक्षीण गोंयांतल्या एका फादरान छत्रपती शिवाजी महाराजांचेर टिका केल्ली. एके चलयेन शिरगांवच्या होमखणाक नांव दवरिल्लें, एके बायलेन फातर्पेंच्या म्हाजनांक कितें म्हणिल्लें तेन्ना केदो बोवाळ जाल्लो? पुलीस केश जाल्ली. माफी मागची पडिल्ली. अटकूय जाल्ली. आतांय सेंट झेवियरा वयल्यान वातावरण तापपाक लागलां. प्रधानमंत्री नरेंद्र मोदी हांच्या सपनांतलो एक भारत, श्रेश्ठ भारत साकार करपाचो आसल्यार सगल्यांनी एकवटान वावुरपाक नाका? धर्म, जातीं मदीं फूट घालीत रावल्यार हें साध्य जातलें?? मोदी बरेच फावट गोंयांतल्या धर्मीक एकचाराची, भावपणाची देख दितात. पिळग्यान पिळग्यो हांगां एकचार नंदता म्हणटात. पूण आमी गोंयकार आमचे कृतीन तांकां फट थारायनात मूं, हाचो विचार दरेकल्यान मनांतलें मनीसपण जागोवन शांतपणान करचो. आमी नेमकें कितें करतात, हाचो फायदो कितलो जातलो काय लुकसाण हाचोय नियाळ घेवचो. गोंयांत, महाराष्ट्रांत कांय फुडारी कडव्या संघटणांच्या वाचाळविरां परस चड खर उलोवपाक लागल्यात. तांकां कोण बळयां हें उलोवपाक बी सांगिना मूं?
भारतीयांनी आपापलो धर्म पाळचो. निधर्मी रावपाचें, सर्वधर्मसमभाव मानपाचें स्वातंत्र्यूय संविधान दिलां. आपलो धर्म कितलो व्हड हें दुसऱ्या धर्माक थोमणो वा चिमटो काडून सांगपाची गरज ना. दुसऱ्यांच्या श्रद्धास्थानांक धपको बसतलो अशें कोणें कितें करप समा न्हय. वाराणसींत हालींच शिर्डी साईबाबाच्यो 14 मुर्ती काडून एके संघटणेन त्यो उदकांत व्हरून सोडल्यो. ताका आतां पुलिसांनी धरला. साईबाबा हे देवपदाक पाविल्ले म्हान संत. तांणी आपलो धर्म सांगलो ना. शिश्य नेमलो ना. 1918 वर्सा दसऱ्याक ते संवसाराक अंतरले. शिर्डी आयज देशांतलें दुसऱ्या क्रमांकाचें लोकप्रीय देवूळ जालां. सगल्या जाती, धर्माचे लोक साईंक भजतात. म्हणटकच वाराणसी सारक्या थळांत
अश्या संता वयल्यान तणाव निर्माण करपाचो न्हय. थंय एकाच धर्माचे लोक आतां एकमेकांच्या विरोधांत वचपाची भिरांत निर्माण जाल्या. खंय व्हरून दवरपाचो आसा आमकां आमचो म्हान भारत देश?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
