भांगरभूंय | प्रतिनिधी
वाराणसी, खबरां संस्था: वाराणसी देवळांतल्यान शिर्डी साईबाबाच्यो मुर्ती काडून उडयिल्ल्या प्रकरणांत पुलिसांनी अजय शर्माक अटक केल्या. शर्मा बिरेस्तारा सकाळीं २ वरांचेर आनीक एका देवळांत साईबाबाची मुर्त काडपाक भायर सरिल्लो. ही म्हायती मेळटकच साद्या कपड्यांनी राविल्ल्या पुलिसांनी ताका उखलून व्हेलो.
डीसीपी काशी गौरव बन्सवाल हांणी म्हणलें – सनातन रक्षक दळाचे प्रदेश अध्यक्ष अजय शर्मा हाका शांततायेचो भंग केल्ले खातीर ताब्यांत घेतलो. मजगतीं, देवळांतल्यान साई मूर्ती काडून उडोवपाचो निशेध करपा खातीर देवळांतल्या पुरयतांनी अजय शर्मा आड चौक पुलीस स्टेशनांत कागाय नोंद केल्ली.
हाचे आदीं शर्मा हांच्या कुटुंबियांनी आरोप केल्लो, मध्यानरातीं २ वरांचेर मैदानी चौकांतल्यान निळ्या गाडयेंतल्यान आयिल्ल्या कांय तरणाट्यांनी ताचें अपहरण केल्लें. तांचे दोनूय मोबायल नंबर बंद आसात.
कॉंग्रेसीचे आदले फुडारी आचार्य प्रमोद कृष्णम हांणी म्हणलां, भारत हो श्रद्धा आनी विश्वासाचो देश आसा. हांगा सगळ्यांचे श्रद्धेचो आदर करपाक जाय. सनातन सगळ्यांचे श्रद्धेचा आदर करता. मुर्ती काडप काय ना हाचो निर्णय देवूळ आनी मुखेल भटजी आनी समितीचेर सोडचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
