भांगरभूंय | प्रतिनिधी
पणजी ः धर्मीक एकचार राखप ही सगल्या समाजांची जापसालदारकी. पूण काँग्रेस फुडारी आनी विरोधी पक्ष फुडारी युरी आलेमांव मतपेटयां खातीर फक्त हिंदूंक आनी उजवे विचारसरणेच्या संघटनाक लक्ष्य करपाचो यत्न करतात अशी टिका भाजपाचे म्हणयारे गिरीराज पै वेर्णेकार हांणी केला. बिरेस्तारा पणजे जाल्ले पत्रकार परिशदेत ते उलयताले.
उजवे विचारसरणेच्या संघटनांचेर टिका करून आलेमांव हांणी काल एक वक्तव्य केल्लें. ह्यो संघटना भाजपा कडेन संबंदीत आशिल्ल्याचें सांगून तांणी त्यो राज्यांतल्यो धर्मीक एकचार इबडायतात असो गंभीर आरोप तांणी केल्लो.
फाटल्या कांय दिसांनी गोंयांत घडिल्ली घडणूक पळोवन काँग्रेस स्वताची मतपेटी सांबाळून फकत हिंदू लोकांक लक्ष्य करता. काँग्रेसीक उजवे विचारसरणेच्या संघटनांचेर कित्याक राग आसा तें स्पश्ट करचें अशें वेर्णेकार हांणी सांगलें.
ताणें म्हणलें, युरी आलेमांव हांणी गोंयच्या डीएनएक धोको आशिल्ल्याचे सांगलें. आलेमांव हांचो डीएनए सगल्या गोंयकारांक खबर आसा. ताकाच लागून 2012 वर्साचे वेंचणुकेंत लोकांनी आलेमांव कुटुंबांतल्या चार उमेदवारांक न्हयकार दिल्लो आसूं येता. भाजपा बायलां, युवा, शेतकार आनी गरीब लोकांच्या उदरगती खातीर वावुरता. ताका लागून काँग्रेसीन आमकां हे विशीं गिन्यान दिवचें न्हय, पयलीं स्वताचो डीएनए पळोवचो.
भावना दुखयल्यात जाल्यार कागाळ करात
स्वताक राजकी चाणक्य समजुपी एका समाजवावुरप्याक विधानसभा वेंचणुकेंत पणजे ५०० मतां मेळिल्लीं. ताका लागून तांच्या विधानाचेर भाजपा प्रतिक्रिया दिवचो ना. तांच्या विधानाक लागून कोणाच्यो भावना दुखावल्यात तर तांणी पुलिशेंत कागाळ करची. पुलीस योग्य कारवाय करतले हाची आमकां खात्री आसा अशें वेर्णेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
