भांगरभूंय | प्रतिनिधी
सांखवाळ गटा उपरात वेलिंगकार हांणीय केली पोरणें गोंय पुलिशेंत कावंटर कम्प्लेंट
पणजी ः सेंट फ्रांसिस झेवियराच्या कुडीची डीएनए चांचणी करपाची मागणी पोरणी आसा. मुक्ती पयलीं आनी मुक्ती उपरांत लेगीत ताचेर वाद जाल्लो. 2014 वर्सा श्रीलंकेंतल्या बौद्ध भिख्खू राहुल खेरा हांणी हीच मागणी केल्ली. हो वाद कायमचो सोंपून सत्य भायर येवचें म्हूण हांवेंनूय मागणी केल्ली. हांतूत कोणाचीच फकांडां करपाचो हेतू ना अशें प्रा. सुभाष वेलिंगकार हांणी स्पश्ट केलें. मजगतीं, सांखवाळ आंदोलनातल्या एका गटान पोरणें गोंय पुलिशेंत कागाळ केले उपरांत आतां प्रा. वेलिंगकार हांणी थंयच कागाळ (कावंटर कम्प्लेंट) केल्या.
इतिहासीक नदरेन म्हत्वाच्या अवशेशांचेर कोणाक दुबाव येवंक फावना अशें वेलिंगकार हांणी सांगलें. हाचे पयलीं पोरन्या गोंयांत जॉर्जियाचे राणीचे अवशेश सांपडिल्ले. जॉर्जिया इगर्जेन मेळिल्ल्या अवशेशांची डीएनए चांचणी करपाक परवानगी दिली. उपरांत चांचणी केली तेन्ना हे अवशेश राणीचेच आशिल्ल्याचें सिद्ध जालें. खात्री करपा खातीर आधुनीक तंत्रगिन्यानाचो वापर केल्यार कांयच चूक ना, अशें तांणी सांगलें.
तांणी म्हणलें, हांवें केल्ली मागणी आनी बौद्ध भिख्खूची मागणी एकूच आसा. तातूंत आक्षेपार्ह वा अपमान करपा सारकें कांयच ना. राज्य संविधाना प्रमाण इतिहासीक सत्य तपासपा खातीर शास्त्रीय पद्दतींचो उपेग करचो अशें म्हणलां. राम देवूळ बांदचे पयलीं थंय खणकाम करताले. सेंट झेवियराच्या कुडीचेर लोकांक दुबाव आसा जाल्यार ही चांचणी केले उपरांत सगळी खात्री जातली हे खातीर हांवें मागणी केल्या. हांतूत खंयच्याच धर्माक दुखोवपाचो हेतू नाशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
