भांगरभूंय | प्रतिनिधी
पणजीः गोंयांतल्या हुशार आनी सृजनशील भुरग्यांक वेगवेगळ्या मळार केल्ल्या कुशळटाये खातीर ‘गोमंत बालभुशण पुरस्कार’ दितात. भुरग्यां मदीं लिपिल्ली कला, गूण सोदून काडून तांचे सृजनशीलतेक उर्बा दिवपाक सादरीकरण कला विभाग, सृजनकला विभाग, सृजनशिल साहित्य विभाग आनी वैज्ञानिक कुशळटाय विभाग अशा चार विभागांतल्यान हे पुरस्कार दितात.
गोंयच्या 10 ते 16 वर्सां पिरायेच्या भुरग्यां खातीर दरेका विभागांत दोन अशे आठ पुरस्कार, जाल्यार दरेका विभागात एक अशे चार पुरस्कार दिव्यांग भुरग्यांक दितात. 10 हजार रुपया आनी यादस्तीक प्रमाणपत्र मेळून वट्ट बारा पुरस्कार दितात. 30 सप्टेंबर दिसा 10 आनी 16 वर्सां पुराय आसप गरजेचें आसा.
सादरीकरण कला विभागांत पाश्चात्य आनी हिंदुस्तानी तालवाद्य वादन, हिंदुस्तानी शास्त्रीय गायन, हिंदुस्तानी शास्त्रीय नाच, नाटक आनी पपेट्री. जाल्यार सुजन कला विभागांत चित्रकला, शिल्पकला, पारंपरीक लोकचित्रांकन आनी हस्तकला. सृजनशील साहित्य लेखन विभागांतल्यान कथा, कविता, ललित निबंद, नाटक संवाद लेखन आनी वैज्ञानीक कुशळटाय विभागांतल्यान वैज्ञानिक प्रकल्प, वैज्ञानिक मॉडेल तयार करप, वैज्ञानीक कुशळटाय वापरुन सामान्य लोकां खातीर ताचो उपेग कसो जातलो अशें उपक्रम हांचो आस्पाव आसा.
हे खातीर निवड चांचणी बालभवन पणजे जातली. ताची तारीख रोखडीच जाहीर करतले. हे संबंदी अर्ज बाल भवन पणजे तशेंच बाल भवन केंद्र मडगांव, सरकारी प्राथमिक शाळा, उजो पालोवपी दळा लागसार आकें, मडगांव गोंय हांगा मेळटात. 16 ऑक्टोबर सांजवेळा 5 वरां मेरेन अर्ज घेवपाची निमाणी तारीख आसा. हे अर्ज भरून बालभवन, कांपाल पणजे हांगा दिवचे अशें कळींत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
