भांगरभूंय | प्रतिनिधी
आंध्र प्रदेश, खबरां संस्था ः आतां फकत 99 रुपयांक खंयच्याय ब्रँडाचो सोरो मेळटलो. हे संबंदी अधिसुचोवणीय जारी केल्या. आंध्र प्रदेशांतल्या चंद्राबाबू नायडू सरकारान 99 रुपया सोरो दिवपाचो निर्णय घेतला. हाका लागून सरकाराची 5500 कोटी रुपया कमाय जातली.
आंध्र प्रदेश सरकारान सोऱ्या संबंदी नवे धोरण जाहीर केलां. ताचे प्रमाण खंयचोय सोरो फकत 99 रुपयांक मेळटलो. हाका लागून उण्या जाल्ल्या विक्रींचेर आळाबंदा हाडपाक मजत जातली अशी आस्त सरकाराक आसा. इतलेंच न्हय तर वाडपी दरांचेरूय नियंत्रण दवरूं येता. तशेंच थळाव्या कंपनींक सवाय ब्रँडेड सोरो तयार करपाचीय संद मेळटली असो दावो राज्य सरकारान केला.
3736 सोऱ्याचीं दुकानां जातलीं उक्तीं
नव्या उत्पादन शुल्क धोरणांतल्यान राज्याक सुमार 5500 कोटी रुपयांचो महसूल मेळटलो अशी आस्त सरकाराक आसा. 12 ऑक्टोबर सावन हें धोरण चालीक लायतले. हाचे भायर राज्यांत 3736 सोऱ्याचीं दुकानांय सुरू करपाचे आसात. राज्यांत ब्रँडेड सोरो 99 रुपया वा ताचे परस उण्या दरान मेळटलो. सध्या हें नवे धोरण दोन वर्सां खातीर लागू आसा.
5 वर्सां दर वाडटाले, विक्री जाताली उणी
आंध्र प्रदेशांत फाटल्या 5 वर्सांत सोऱ्याचे दर स्थिरपणान वाडत आशिल्ल्यान विक्री उणी जाल्या. देशांत बियर उद्देग चलोवपी संघटनेच्या म्हणण्या प्रमाण आतां राज्यांतूय गुंतवणूक वाडूंक शकता. दरेक सोरोभट्टीचेर सुमार 300 ते 500 कोटी रुपया खर्च जातात. उत्पादन शुल्क धोरणा प्रमाण ऑनलायन लॉटरी वरवीं परवानो दितले. राज्यांत चार प्रकारचे परवाने मेळटले, आनी तांची फी 50 लाख तें 85 लाख मेरेन दवरल्या. दुकानदारांक विक्रीचेर 20 टक्के फायदो दितले. हाचे भायर 12 प्रीमियम दुकानांचो परवानो एक कोटी रुपयांत 5 वर्सां खातीर मेळूं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
