भांगरभूंय | प्रतिनिधी
बायलांचे 9वे संवसारीक टी-20 सर्तीक आयच्यान संयुक्त अरब अमिरातांत सुरवात जाता. आयज दोन मॅची जातल्यो. उक्तावणाची मॅच शारजा क्रिकेट स्टेडियमाचेर बांगलादेश आनी स्कॉटलॅण्ड ह्या ब गटांतल्या पंगडां मदीं जातली, जाल्यार दुसरी मॅच सांजे वेळार पाकिस्तान आनी श्रीलंका ह्या अ गटांतल्या पंगडां मदीं जातली. सर्तींत वट्ट 10 पंगड वांटो घेतले. फायनल 20 ऑक्टोबराक जातली.
आदीं थारायिल्ल्या वेळापत्रका प्रमाण सर्त बांगलादेशांत जावपाची आशिल्ली. पूण, राजकी अस्थीरताय लागून आंतरराष्ट्रीय क्रिकेट समितीन सर्त बांगलादेशांतल्यान युएईंत स्थलांतरीत करपाचो निर्णय घेतलो.
किताबाच्या मुखेल दावेदारां मदीं ऑस्ट्रेलियेचो पंगड सगल्यांत मुखार आसा. ताणें फाटल्या आठ सर्तींनी खेळटना स खेपे वस्तादपण जोडलां. ऑस्ट्रेलिया पंगडाक हारोवप शक्य आसा हें इंग्लंड, भारत आनी दक्षीण आफ्रिका ह्या पंगडांनी दाखोवन दिलां. पूण, संवसारीक टी-20 सर्तींत ऑस्ट्रेलिया पंगडा मुखार कोणाचेंच शाणपण चलना.
अ गटांत भारत, पाकिस्तान, ऑस्ट्रेलिया, न्युझिलॅण्ड आनी श्रीलंका ह्या पंगडांचो आस्पाव आसा, जाल्यार ब गटांत बांगलादेश, स्कॉटलॅण्ड, इंग्लंड, दक्षीण आफ्रिका आनी वॅस्ट इंडीज ह्या पंगडांक सुवात दिल्या.
भारताची पयली मॅच फाल्यां
भारत आपली पयली मॅच फाल्यां न्युझिलॅण्डा आड खेळटलो. जाल्यार 6 ऑक्टोबराक भारत आनी पाकिस्तान ही म्हत्वाची मॅच जातली. 9 ऑक्टोबराक श्रीलंके आड खेळटलो जाल्यार गटांतली निमाणी मॅच 13 ऑक्टोबराक बळिश्ट ऑस्ट्रेलिये आड खेळटलो.
भारतान अजून मेरेन ही सर्त जिखूंक ना. फकत एकदाच फायनलींत पाविल्लो. पूण, त्या वेळार ताका ऑस्ट्रेलिया पंगडा कडल्यान हार घेवची पडिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
