भांगरभूंय | प्रतिनिधी
कोर्ट जंक्शना वयलें ट्रॅफीक सिग्नल सेटींग हालयिल्ल्याचो परिणाम
भांगरभूंय । प्रतिनिधी
म्हापशें: म्हापश्यां कोर्ट जंक्शना वयल्या ट्रॅफीक सिग्नल यंत्रणेचो वेळ तशें सेटिंगांत बदल केल्ल्यान म्हापशें शारांतली येरादारेची कोंयडी आनीक वाडल्या. दीसभर ह्या जंक्शनाचेर गाडयांच्यो लांब रांको लागिल्ल्यो आसतात. हे येरादारीचे कोंयडेंत अॅम्युबलन्सी लेगीत आडकून उरतात. येरादारीच्या वेवस्थापनाचे नदरेन उबारिल्ली ही यंत्रणाच सध्या येरादारीचे कोंयडेचें कारण थारल्या.
येरादारी पुलिसांचे सुचोवणे प्रमाण संबंदीत कंपनीन कोर्ट जंक्शना वयले हे ट्रॅफीक यंत्रणांच्या वेळांत आनी सेटिंगांक अचकीत बदल केला. चार रस्त्यां मदल्या एकाच रस्त्या वयली येरादारी एका वेळार सोडटात. तशेंच सिग्नल पडपाच्या वेळूय खूब वाडयला. ताका लागून ह्या रस्त्यांचेर गाडयांच्यो रांको लागतात. अशीर रस्त्याक लागून दुसरी गाडयेक वचपाक वाट आसना. आदीं दोनूय समान रस्त्या वयली येरादारी एकाच वेळार सोडटाले. येरादारी पुलिसांच्या ह्या परिक्षण कसरतीचो मार गाडी चालक, प्रवासी आनी विद्यार्थ्यांक बसता.
ट्रॅफीक सिग्नल्स यंत्रणा मार्गदर्शक वळेरे प्रमाण सुरवातीक शारांत उबारिल्ल्या सगळ्या जंक्शना वयल्या ह्या यंत्रणांचें अशेच तरेन सेटींग दवरिल्लें. मात शारांतल्या अशीर रस्त्यांक लागून येरादारीचे सोयी प्रमाण हे यंत्रणांनी बदल केल्लो. ते उपरांत येरादारी सुरळीत चलताली. मात परतून परतून ह्या यंत्रणांनी जावपी बिघाडाचो परिणाम येरादारीचेर जाल्लो. तशेंच ह्या यंत्रणांतल्या बदला वेलार येरादारी पुलीस वा संबंदीत यंत्रणा बसोवपी एजन्सी कडल्यान पालिका मंडळाक विस्वासांत घेवंक ना. ह्या एकंदरीत ट्रॅफीक यंत्रणा येवजणेचेर थळाव्या लोकांनी तशेंच गाडयेकारांनी निरशेवणी उक्तायल्या. वाहन चालक जयेश नायक हांणी सांगलें, कोर्ट जंक्शना वयले ट्रॅफीक सिग्नल यंत्रणेंत बदल केल्ल्यान येदारारेची कोंयडी जाता. हे कोंयडेंत वराचीं वरां आडकून उरतात. आदले वरी सिग्नलाची सेटींग दवरपाक जाय. मात तातूंत बदल केल्ल्यान लोकांक गरजे भायर त्रास सोंसचो पडटा. ही यंत्रणा खऱ्यांनीच येरादारी वेवस्थापने खातीर उबारल्या काय, असो प्रस्न तांणी उपस्थीत केलो.
कोर्ट जंक्शनार येरादारेची कोंयडी जाता अशें दिशिल्ल्यानूच ट्रॅफीक पुलिसांचे सुचोवणे प्रमाण हे यंत्रणेचो वेळ वाडटला. तशेंच एका वेळार एके लेनींतली येरादारी सोडटात. ते खातीर ही समस्या उप्रासल्या. येरादारी पुलीस निरिक्षकाक आपोवन हाचेर दोन दिसां भितर उपाय काडपाची सुचोवणी पालिकेन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
