भांगरभूंय | प्रतिनिधी
शक्ति रूपेण संस्थिता: नवरात्रां हो पवित्र हिंदू उत्सव. ह्या दिसा आमी वायटाचेर बऱ्याच्या जैताचो उगडास करतात आनी स्त्री उर्जेची परब मनयतात. ह्या णव दिसांच्या उत्सवांत स्त्रीत्वाची शक्त, बळ आनी लवचीकपण हांचें प्रतीक आशिल्ल्या दुर्गा देवीच्या णव रुपांचो भोवमान जाता. ह्या आनंदी उत्सवाक सुरवात करतना आमी बायलपणाचे सार आनी आमच्या समाजांत ताचें म्हत्व चिंतूंया.
नवरात्री बायलांचें सशक्तीकरण आनी समाज घडोवपाक तांची अत्यावश्यक भुमिका हांचो एक बळिश्ट उगडास करता. परंपरेची आनी संस्कृतायेची पोसवण करपी, काळजी घेवपी आनी राखण दिवपी बायलां हीं कुटुंबां, समाज आनी राश्ट्रां हांचे फाटीचो कणो . बायलपणाची परब मनयतना आमी तांचें योगदान, त्याग आनी अखंड समर्पणाची वळख करता. नवरात्रां मनयतना बायलांक आडमेळीं हाडपी सामाजीक रूढिवादांतल्यान मुक्त जावपाची गरजय आमी वळखुपाक जाय. बायलांक तांचीं सपनां पळोवपाक, साकार करपाक, पितृसत्ताक नेमांक आव्हान दिवपाक आनी आपले हक्क दाखोवपाक आमी प्रोत्साहन दिवंक जाय. बायलांचें सशक्तीकरण ही फकत समाजीक अनिवार्यताय न्हय तर अर्थीक आनी नैतीक गरज. नवरात्रां आमकां लवचीकपण,अनुकूलताय, धैर्य, निर्धार ही मुल्यां आपणावपाची प्रेरणा दिता.
ह्या नवरात्रांक आमी दरेक बायले भितरल्या देवीचो भोवमान करूंया. आमी बायलां सशक्तीकरणा खातीर वावुरतले, अशें निश्चेव करुया.
– वेदा रेगे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
