भांगरभूंय | प्रतिनिधी
वास्को ः टीबी कुन्हा चौका लागसार आशिल्ल्या वास्को भाजी मार्केटांतल्या ऊसाच्या रोसाच्या स्टॉलाक मंगळारा सकाळीं सुमार ५.१५ वरांचेर उजो लागलो. उजो पालोवपी दळान रोखडोच उजो नियंत्रणांत हाडलो. ताका लागून तो लागसारच्या दुकानांनी पातळूंक ना.
ह्या घडणुकेंत अदमासान देड लाख रुपया लुकसाण जालें, पूण उजो पालोवपी दळाच्या वेळार उजो नियंत्रणांत हाडिल्ल्यान सुमार पांच लाख रुपयांची मालमत्ता वाटावली अशें दळाचे अधिकारी दिलीप बिचोलकार हांणी सांगलें.
ह्या घडणुके वेळार जायत्या विक्रेत्यां कडेन वास्को उजो पालोवपी दळाचो संपर्क क्रमांक नाशिल्ल्यान तांणी ताचे बदला ‘100’ आनी हेर आपत्कालीन सेवा डायल केली. ही पळोवपाक गेल्यार गंभीर समस्या. राज्यभरांतल्या लोकांनी उजो पालोवपी दळ, वीज कार्यालय, पुलीस, हाॅस्पिटल तशेंच हेर गरजेचे फोन नंबर बरोवन दवरपाक जाय, अशें श्री. बिचोलकार हांणी सांगलें. उजो पालोवपी दळाचे तीनूय संपर्क क्रमांक विक्रेत्यांक दिल्यात, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
