भांगरभूंय | प्रतिनिधी
युपीएस येवजणेचो अभ्यास करतले : अ. गों. कर्मचारी संघटणा
पणजी, प्रतिनिधी : केंद्र सरकाराची यूपीएस येवजण लागू करपाचो निर्णय गोंय सरकारान जरी घेतला तरी कर्मचारी संघटणेची पोरणी पेन्शन येवजण (ओपीएस) लागू करपाची मागणी सुरूच उरतली. एनपीएस वा यूपीएसचे तुळेंत ओपीएस (ओल्ड पेन्शन स्कीम) चड फायद्याचें आसा. हाका लागून केंद्र तशेंच राज्य सरकारा कडेन ओपीएस लागू करपाची मागणी आमी परत करतले. अखील गोंय कर्मचारी संघटणेचे अध्यक्ष अभय मांद्रेंकार हांणी ही म्हायती दिली.
यूपीएस येवजणेचो संघटणा अभ्यास करतली. हाचे उपरांत योग्य तें निवेदन आमी सरकाराक सादर करतले. एखादो मनीस १८ व्या वर्सा नोकरेक लागलो आनी ५५ व्या वर्सा ताणें व्हीआरएस घेतली जाल्यार ताची सेवा ३७ वर्सांची जाता. ह्या मनशाक यूपीएस येवजणे प्रमाण फावो ते प्रमाणात लाव मेळचे नात. तशेंच सरकारान एनपीएस वा यूपीएस निवडीचो पर्याय कर्मचार्याक दिवपाक जाय. सरसकट सगळ्यांक यूपीएस येवजण लागू करपाक मेळची ना, अशेंय मांद्रेंकार हांणी सांगलें. युपीएस येवजण सरकारी कर्मचार्यांक लागू करपाचो निर्णय गोंय सरकारान सोमारा घेतलो.
यूपीएस विशीं केंद्रा कडल्यान आजून अधीसुचोवणी जारी जावपाची आसा. ती जारी जातकीर सगळ्यो गजाली स्पश्ट जातल्यो, अशें मांद्रेंकार हांणी सांगलें.
सध्या एनपीएस येवजणे खाला ४५,१५० सरकारी कर्मचार्यांची नोंदणी जाल्या. एनपीएस येवजणेंत कर्मचार्यांचें योगदान मुळ पगाराच्या १० टक्के जाल्यार सरकाराचें योगदान १४ टक्के आसा. सध्या गोंय सरकार एनपीएसाचेर म्हयन्याक ३१.३५ कोटी रूपया मोडटा. युपीएस येवजणे खातीर म्हयन्याक १८.५ टक्के फारीक करचे पडटले. हाका लागून सरकाराक म्हयन्याक ४१.४३ कोटी रूपया मोडचे पडटले. एनपीएसच्या तुळेंत युपीएस येवजणेचेर सरकाराक १०.०७ कोटी चड फारीक करचे पडटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
