भांगरभूंय | प्रतिनिधी
पणजी ः गोंय मनीसबळ विकास म्हामंडळ वरवीं भरती करपा खातीर 944 रिक्त पदां खातीर अर्ज करपाची प्रक्रिया सुरू जाल्या. तातूंतले अर्ज क्रमांक 1 ते 6000 गायब जाल्यात. उमेदवारांक 6 हजारां फुडलें अर्ज दितात म्हणून हे प्रक्रियेंत भानगड जाला असो आरोप आम आदमी पक्षाचे प्रदेशाध्यक्ष अमित पालेकार हांणी केला. मंगळारा पक्षाच्या शिश्टमंडळान म्हामंडळाक निवेदन सादर करून भरती प्रक्रिया नव्यान सुरू करपाची मागणी केली. ह्या वेळार रोहन नायक, सलमान खान, चेतन कामत आनी हेर हाजीर आशिल्ले.
आमच्या शिश्टमंडळान म्हामंडळाक भेट दिली तेन्ना थंय जबाबदार अधिकारी हाजीर नाशिल्लो. आमी अर्ज घेतले तेन्ना ते 14 हजारां फुडल्या क्रमांकाचे आशिल्ले. आमकां मेळिल्ले म्हायती प्रमाण, एक ते स हजार अर्ज क्रमांक गायब जाल्यात. हे अर्ज खंय गेले हाची म्हायती हाजीर आशिल्ल्या अधिकाऱ्यांनी दिवंक ना. हे गायब जाल्ले अर्ज आमदारां मदीं वांटल्यात काय हाची जाप सरकारान दिवची अशें पालेकार हांणी सांगलें.
रोहन नायक हांणी सांगलें, अर्ज शुल्क पन्नास रुपया आसा. पूण ऑनलायन पेमेंट सुविधा उपलब्ध ना. 50 रुपया घेवनूच अर्ज दितात. ताची पावती दिनात. एके वटेन सरकार डिजिटल मळार मुखार वचपाक सोदता जाल्यार दुसरे वटेन रोख पयशे घेता. अर्ज प्रक्रियेंतली भानगड कळची न्हय म्हणून ऑनलायन प्रक्रिया केली नासतली. ही सगळी भरती प्रक्रिया परतून सुरू करून ऑनलायन अर्ज उपलब्ध करपाची मागणी तांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
