भांगरभूंय | प्रतिनिधी
रोहीत शर्मा, यशस्वी जयस्वाल, लोकेश राहुल आनी विराट कोहली हांचे आक्रमक बॅटिंगे नेटार भारतान बांगलादेशा आड चालू आशिल्ली दुसरी टॅस्ट उमळशीक स्थितींत हाडल्या.
भारतान कानपूर टॅस्टीच्या चवथ्या दिसा पयलीं बांगलादेशाचो पयलो डाव फकत 233 धांवड्यांचेर सोंपयलो आनी उपरांत तांची बॅटींग करपाची पाळी आयली तेन्ना फकत 34.4 ओव्हरींनी 285 धांवड्यो करून डाव घोशीत केलो.
भारतान डाव घोशीत केलो त्या वेळार ताचे कडेन 52 धांवड्यांची आघाडी आशिल्ली. चवथ्या दिसाचो खेळ सोंपलो त्या वेळार बांगलादेशान आपल्या दुसऱ्या डावांत 2 बाद 26 धांवड्यो केल्ल्यो. अशे तरेन तो भारता परस अजून 26 धांवड्यांनी फाटीं आसा. दोनूय विकेटी आर आश्विनान घेतल्यो.
भारत ज्या वेळार बॅटिंगेक आयलो त्या वेळार ताणें आपली रणनिती पयले ओव्हरींत स्पश्ट केल्ली. यशस्वी जयस्वालान पयले ओव्हरींत तीन चवके मारले. जाल्यार रोहीतान दुसरे ओव्हरीचो पयलोच बॉल लॉंग ऑना वयल्यान सको मारलो. ते उपरांत फुडल्या बॉलाचेर चवको मारलो.
दोगांयची बॅटींग पळोवन बांगलादेशाच्या मुखेल्यान स्लीपांतले आनी गलींतले फिल्डर काडून शिमे लागसार उबे केले. पूण, यशस्वी आनी रोहीत मातूय फाटीं सरूक ना. तांणी फकत तीन ओव्हरींनी 51 धांवड्यो केल्यो. चवथे ओव्हरींत रोहीत शर्मा सको मारपाच्या यत्नांत मेहदी हसन मिराजाच्या बॉलाचेर बोल्ड जालो. ताणें 11 बॉलांनी 23 धांवड्यो केल्यो.
रोहीत बाद जाल्या उपरांत शुभमन गिलान यशस्वी वांगडा आनीक एक बरी भागिदारी केली. दोगांयनी दुसरे विकेटी खातीर 72 धांवड्यो जोडल्यो. ही जोडी हसन महमूदान फोडली. यशस्वी बोल्ड जालो. पूण, बाद जावचे पयलीं यशस्वीन आपलें काम केल्लें. ताणें 51 बॉलांनी ताबडतोड 72 धांवड्यो केल्यो.
यशश्वी बाद जाल्या उपरांत भारताचो डाव मात्सो गडगडलो. 127 धांवड्यांचेर यशस्वी बाद जाल्लो. हांगाच्यान 159 मेरेन पावता पावता भारतान ऋषभ पंत आनी गिलाची विकेट व्हगडायली. ते उपरांत राहुल आनी कोहली हांणी बरी भागिदारी केली. तांणी 59 बॉलांनी 87 धांवड्यो केल्यो. कोहली 47 धांवड्यो करून बाद जालो. राहुलान 43 बॉलांनी 68 धांवड्यांची खेळी केली.
टॅस्टीच्या पयल्या तीन दिसा पावसान आडखळ हाडिल्ली.
काल चवथ्या दिसाचो खेळ सुरू जालो आनी सवे ओव्हरींत जसप्रीत बुमरान मुशफिकूर रहिमाक बाद केलो. हांगाच्यान भारताच्या बॉलरांनी आपलो शेक दवरलो. तांणी थारावीक अंतरान विकेटी घेतल्यो अशे तरेन बांगलादेशाचो डाव 233चेर सोंपयलो.
बुमरान तीन, जाल्यार आकाशदीप, मोहम्मद सिराज आनी आर आश्विन हाणें दरेकी दोन विकेटी घेतल्यो.
संवसारीक टॅस्ट चॅम्पियनशिपीचे फायनलींत पावपाचे दिश्टीन भारता खातीर ही टॅस्ट मॅच म्हत्वाची आसा. भारत जैत जोडटा जाल्यार ताचें फुडलें काम सोंपें जातलें. ताकाच लागून भारताचो जैत जोडपाचो यत्न आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
