भांगरभूंय | प्रतिनिधी
आंध्र प्रदेशांतल्या तिरुमल पर्वताचेर आशिल्ल्या भगवान तिरुपती मंदिरांत प्रसाद म्हणून मेळपी लाडू सध्या बरोच गाजूंक लागला. ह्या लाडवांत जनावरांची चरबी आनी फीश आॅयलीचे अंश मेळिल्ल्याचें सिद्ध जाल्ल्याची म्हायती लॅबाच्या तपासणी अहवालांतल्यान मुखार आयल्या. आंध्र प्रदेशांतले टीडीपी फुडारी आनी मुख्यमंत्री चंद्राबाबू नायडू हांणी आदले मुख्यमंत्री जगनमोहन रेड्डी हांच्या कार्यकाळांत तिरुपतीच्या लाडवांत जनावरांचे चरबेचो वापर जातालो असो आरोप केल्ल्यान हो लाडू सध्या चर्चेंत आसा.
तिरुपती बालाजी मंदिरांत भाविकांक दितात त्या लाडवाचो प्रसाद खूब पवित्र मानतात. तिरुपती बालाजीक अर्पण करतात त्या लाडवांच्या निवेद्याक खूब म्हत्व आसा. दिसाक लाखांनी लाडू तयार जातात. पूण आतां ह्या लाडवांत जनावरांची चरबी, नुस्त्यांचें तेल आनी लार्ड आशिल्ल्याचें उक्तडार आयिल्ल्यान भाविकां मदीं तिडकीचें वातावरण पातळ्ळां.
तिरुपती मंदिरांत दर वर्सा लाखांनी भावीक भेट दितात. हांगा प्रसाद म्हणून लाडू मेळटा. तो आकारान हेर लाडवां परस मातसो मोटो आसता, तसोच आकर्शक, पुश्टीक आनी रुच्चीक आसता. 175 ग्रामाचो हो लाडू करपा खातीर देवळांत विशेश वेवस्था आसा. दिसाक साडेतीन लाख लाडू तयार जातात. वर्साक सादारण 5 लाख कील तूप प्रसादाच्या लाडवा खातीर लागता. तुपाचें आनी लाडवा खातीर वापरतात त्या सामुग्रीचें परिक्षण करपा खातीर एक लॅब देवळांतूच आसा. ह्या सगल्या परिक्षणांतल्यान तिरुपती मंदिरांतल्या प्रसादाचो लाडू भाविकांच्या हातार पडटा. ह्या प्रसादा विणें तिरुपतीचें दर्शन अपूर्ण मानतात. ह्या लाडवाचें मोल 10 ते 25 रुपयां मेरेन आसता. फाटलीं 300 वर्सां हांगा हे लाडू तयार जातात.
ह्या लाडवाची खासीयत अशी की ते कितलेय दीस दवरले म्हणून पेड्ड्यार जायनात. म्हणुनूच हांगा येवपी दरेक भावीक हो प्रसाद घेवन वता. ह्या प्रसादाकूय धर्मीक म्हत्व आसा. इतलेंच न्हय जाल्यार ह्या मंदिरांत आयिल्लो भावीक प्रसाद म्हणून लाडू खरेदी करता आनी आपले वांगडा हेरांक दिवपा खातिरूय घेवन वता. बदाम, किसमीस, काजू, बंगाली हरभरो, साकर आनी गायेच्या तुपा पसून हे लाडू तयार करतात. 1715 वर्सा सावन तिरुपती बालाजी मंदिरांत हे लाडू तयार जातात. भावीक श्रद्धेन देवाची भेट घेतात आनी प्रसाद म्हणून लाडू व्हरतात.
ह्या देवळाचें खाशेलपण म्हणल्यार शुद्धतायेचें प्रमाणपत्र आसले बगर तुपाचो वा हेर कसल्याय जिनसाचो ट्रक देवळांत प्रवेश करूंक शकना. देवळाच्या वाठारांतूच लॅब आसा. थंय प्रसादा खातीर वापरतात त्या जिनसांची तपासणी जाता. प्रसादाचें सदांच प्रमाणीकरण जाता. उपरांतूच तो प्रसाद भाविकांक दितात. इतली खर वेवस्था आसतना प्रसादा खातीर वापरतात त्या तुपाची गुणवत्ता कितें आसा हें कोणाकूच खबर ना? लाडवाच्या तुपांत चरबी आसा असो आरोप करून गोंदळ निर्माण करपा फाटलें कारण कितें तेंच कळना.
ह्या लाडवांत जनावरांची चरबी आशिल्लें तूप वापरतात अशें सांगपी अहवाल गुजरातचे एके प्रयोगशाळेन दिलो आनी ताचेर मुख्यमंत्री चंद्राबाबू नायडू हांणी श्रद्धेचें राजकारण केलें. प्रसादाच्या लाडवांत चरबी वापरतात आनी तें कोणाक खबर ना, अशें जावंक शकता? नायडू हांणी तिरुमला मंदिराच्या पावित्र्याचो भंग केला. कोट्यांनी हिंदूंच्यो भावना दुखावल्यात आनी म्हणुनूच चंद्राबाबू नायडू हांणी केल्ल्या आरोपाची चवकशी जावंक जाय. कारण हो श्रद्धेचो प्रस्न आसा. भावीक श्रद्धेन ह्या देवळांत येतात. प्रसादाचो लाडू घेतात. श्रद्धे विशीं राजकारण योग्य न्हय. देवाच्या प्रसादाचें राजकारण समाजाक घातक थारूं येता. देवाक तरी राजकारणा पासून पयस दवरात.
अतुल र. पंडित
9623269013
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
