भांगरभूंय | प्रतिनिधी
पणजी : सनबर्न आयोजकां मुखार गोंयांत नेमकी ही कार्यावळ खंय आयोजीत करची हो प्रस्न येवन उबो रावला. हालींच पंचायत मंत्री माविन गुदिन्हो, आमदार आंतोन वाझ आनी रेजिनाल्ड हांणी मुख्यमंत्र्यांची भेट घेवन, दक्षीणेक सनबर्नची परवानगी न्हयकारची अशी मागणी केल्ली. तेन्ना मुख्यमंत्र्यानीय ही मागणी मान्य करून, दक्षीणेंत सनबर्न जावचो ना अशें म्हणलां.
मजगतीं, बार्देश म्हालांतल्या कामुर्ले गांवांत अंदूं सनबर्न जातलो अशी चर्चा रंगिल्ली. मजगतीं तांणीय तिडक उक्तायिल्ल्यान तीय शक्यताय भंगली. मात आतां कळंगूटेचे आमदार मायकल लोबो हांणी अंदूं सनबर्न कळंगूटे आयोजीत करपाक कांयच हरकत ना, अशें विधान केलां.
गोंयांत आमचो मतदारसंघ सोडल्यार सनबर्नाक कोणूच सुवात दिवपाक तयार ना. सनबर्न आदीं कांदोळे जातालो. उपरांत तो वागातोरूय आयजीत केलो. ह्यो दोनूय सुवातो बर्यो आसात. आतां दक्षीणेच्या लोकांक तांच्या गांवांत सनबर्न नाकाच. तरीय थंयच ह्या सुवाळ्याचें आयोजन केल्यार लाखांनी लोक रस्त्याचेर देंवतले. राज्या खातीर ही लजेची गजाल. गोंयच्या हेर गांवांनी सनबर्न आयोजीत करपाची तयारी दाखयल्यार ताकाय फाटबळ आसतलें अशें लोबो हांणी सांगलें.
मजगतीं, सनबर्न हो सदांचो वादाचो विशय थारला. हांगा व्हडा प्रमाणांत घुवळे वखदां वापरतात. ओव्हरडोसाक लागून खुबश्या जाणांक मरण आयिल्ल्याच्योय घडणुको हांगा घडल्यात. देशाचे तरणे पिळगेक वायट मार्गार व्हरपी ह्या सनबर्नाक परवानगी नकाच, अशें म्हणीत दक्षीणेंतल्या खुबश्या ग्रामसभांनी हाचे आड थाराव मंजूर करून ते मुख्यमंत्र्यांक धाडिल्ले.
मजगतीं, आयज पर्वरे मंत्रालयांत जाल्ले बसके उपरांत पत्रकारांनी हे विशीं विचारलें तेन्ना, ’आयोजकांनी सुवात सोदून योग्य प्रस्ताव सादर केल्यार सनबर्नाक निश्चीतूच परवानगी मेळटली’ अशें पर्यटन मंत्री रोहन खंवटे हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
