भांगरभूंय | प्रतिनिधी
पणजी ः गोंय सरकाराच्या म्हायती तंत्रज्ञान, इलेक्ट्रॉनिक्स आनी कम्युनिकेशन्स विभागान अनुसुचीत जमाती (एसटी) आनी अनुसुचीत जाती (एससी) मदल्या गुणवंत विद्यार्थ्यांक 2023-2024 शिक्षणीक वर्सा खातीर मुफत लॅपटॉप येवजणे खातीर अर्ज उपलब्ध आसात अशें जाहीर केलां.
एससी/ एसटी समाजांतल्या विद्यार्थ्यां मदीं म्हायती तंत्रज्ञान (आयटी) आनी डिजिटल कुशळटाय वाडोवपाच्या हेतान गोंय सरकाराच्या आयटीई अँड सी विभागान ही येवजण सुरू केल्या. येवजणे वरवीं ह्या विद्यार्थ्यांक आयटी मळार उच्च शिक्षण घेवपाक प्रोत्साहन दितात. ह्या उपक्रमांतल्यान अनुसूचित जाती/ जमातींच्या विद्यार्थ्यांक तंत्रगिन्यानाचेर आदारिल्ल्या युगात फुडार घडोवपा खातीर गरजेची कुशळटाय सशक्त करपाचो सरकाराचो हेत आसा.
हे येवजणे खातीर पात्र आशिल्ल्या विद्यार्थ्यांनी अधिकृत ऑनलायन पोर्टला वरवीं अर्ज करपाक जाय. ही संकेतथळ 30 सप्टेंबर 2024 सावन सुरू जातली. जाल्यार अर्ज सादर करपाची निमाणी तारीक 30 ऑक्टोबर 2024 मेरेन आसतली. चड म्हायती खातीर आनी अर्ज सादर करपा खातीर इत्सूक आनी पात्र आशिल्ले विद्यार्थी https://merit.goa.gov.in. ह्या अधिकृत संकेतथळाक भेट दिवंक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
