भांगरभूंय | प्रतिनिधी
व्हांळ हुपचे खातीर वापर, सांकव बांदपाची पालकांची मागणी
भांगरभूंय । प्रतिनिधी
फोंडें: संवसार सध्या लायटीच्या आदारान विवीध उपकरणांचेर चलता. लायटी बगर लोकांचें जगप कुस्तार जालां. खांडेंपार पंचायतींतल्या पाचमे गांवांतल्या विद्यार्थ्यांक लेगीत शाळेंत वचपा खातीर लायटीच्या खांब्याचो वापर करचो पडटा. गांवांतल्यान शाळेंत वतना वाटेर एक व्हांळ लागता आनी तो हुपचे खातीर त्या व्हाळाचेर लायटीचो खांबो आडवो घातला. ताचे वयल्यान चलून विद्यार्थी हो व्हांळ हुपतात. ह्या व्हांवाचेर सांकव बांदचो अशी ह्या गांवांतल्या लोकांची कितल्याश्याच वर्सांची मागणी सरकारी दरबारांत पडून आसा. सरकारान विद्यार्थ्यांचे सुरक्षे खातीर ताकतिकेन गरजेचे उपाय करपाची मागणी थळाव्या लोकांनी केल्या.
पाचमे- खांडेपारा लोकांक व्हांळाचेर घातिल्ल्या लायटीच्या खांब्या वयल्यान यो- वच करचें पडटां. गांवांतली सुमार 20- 22 भुरगीं शाळेंत वचपा खातीर ह्याच खांब्यां वयल्यान येतात- वतात. ह्या खांब्या वयल्यान एकाद्या भुरग्याचो पांय निसरलो जाल्यार तो थेट व्हांळांत पडपाचो धोको आसा. पावसाच्या दिसांनी हो व्हांळ उपाट भरून व्हांवता. अश्या वेळार हो व्हांळ हुपप भुरग्यां खातीर धोक्याचो थारता. हेच खातीर गांवांतले लोक परतून परतून ह्या व्हाळाचेर सांकव बांदपाची मागणी करतात.
पाचमे गांवांत सुमार 35- 40 घरां आसात. गांवांत वचपा खातीर लोकांक रानांतल्यान वाट आसा. पूण व्हांळा वयल्यान गेल्यार शाळेंत बेगीन पावतात. हे खातीर भुरगीं ह्याच व्हांळा वयल्यान वचप पसंत करतात. तांचे वरी गांवांतले हेर लोक लेगीत हेच वाटेचो पर्याय स्विकारतात. पाचमे गांवांतले संतोष सतरकार ह्या पालकान सांगलें, गांवांतलीं सुमार 20- 22 भुरगीं धोको पत्करून ह्या व्हांळाचेर आशिल्ल्या लायटीच्या खांब्या वयल्यान शाळेंत वतात. पावसाळ्यांत लायटीच्या खांब्या वयल्यान वतना पांय निसरून व्हांळांत पडपाचो धोको आसता. हे खातीर ह्या व्हांळाचेर सांकव बांदपाची मागणी कितल्याश्याच वर्सां सावन पालक करतात. सरकारान गांभीर्य वळखून तत्काळ दखल घेवपाची गरज आसा.
सांकव बांदपाची प्रक्रिया चल्ल्याः सरपंच
व्हांळाचेर घातिल्ल्या लायटीच्या खांब्या वयल्यान भुरगी धोकादायक स्थितींत येतात- वतात, हाची दखल पंचायतीन घेतल्या. उदका स्रोत खात्या वतीन सांकव बांदपाची प्रक्रिया सुरू केल्या. ते संबंदीची फायल मंजुरी खातीर धाडल्या, अशें कुर्टी- खांडेपारचे सरपंच हरीश नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
