भांगरभूंय | प्रतिनिधी
थळाव्या लोकांनी दिल्ली मुजत आयज सोंपता
भांगरभूंय । प्रतिनिधी
पणजी : स्मार्ट सिटीच्या कामाक लागून पेड्डेर जाल्ल्या रायबंदर रस्त्यांची स्थिती पयली सारकीच आसा. लोकांक अजून फोंडकुलांतल्यान वाट सोदीत गाडयो चलोवच्यो पडटात. फोंडकुलां पुरोवन रस्ते दुरुस्त करपा खातीर रायबंदर वाठारांतल्या लोकांनी दिल्ली मुजत आयज 30 सप्टेंबराक सोंपता. एकंदर स्थिती पळयली रायबंदरचे रस्ते दुरुस्त जावपाक आनीक म्हयनो तरी लागतलो.
रायबंदरच्या लोकांनी पेड्डेर जाल्ल्या रस्त्यांचेर तिडक उक्तायतना रास्ता रोको करपाची शिटकावणी दिल्ली. 30 सप्टेंबर बेरेन पेड्डेर रस्ते दुरुस्त केले नात, जाल्यार आंदोलन करपाची शिटकावणी रायबंदरच्या लोकांनी दिल्ली. ही मुजत आयज 30 सप्टेंबराक सोंपता. रायबंदरा स्मार्ट सिटी कडल्यान क्रॉस ड्रेनींचो वावर सुरू आसा. कांय कडेन फोंडकुलां पुरोवन भौशीक बांदकाम खात्यान पॅच वर्क केलां. तरी लेगीत पाटो ते पोरणे दांत म्हाविद्यालय इमारती मेरेन पयली सारकेच रस्ते पेड्डेर आसात. रास्ता रोको करपाची शिटकावणी दिवन लेगीत रस्त्यांचे स्थितींत कसलोच फरक पडूंक ना. हाका लागून फोंडकुलांनी गाडयो वचपा सयत धुल्लाचें प्रदुशण जावपाचे प्रकार चालूच आसा.
गोंयभरांतल्या रस्त्यांची फोंडकुलां पडून चाळण जल्या. ते खातीर मुख्यमंत्री डॉ. प्रमोद सावंत हांणी खर कारवाय करतना 30 अभियंत्यांक आनी 27 कंत्राटदारांक कारणां दाखयात नोटिसो जारी केल्यात. स्मार्ट सिटीच्या कामाक लागून रायबंदरचे रस्ते चडूच पेड्डेर जाल्यात.
हे विशीं उलयतना रायबंदरचे नगरसेवक सँड्रा डिकुन्हा हांणी सांगलें, रायबंदराच्या रस्ते दुरुस्ती विशीं भौशीक बांदकाम खातें तशेंच स्मार्ट सिटीच्या अधिकाऱ्यां कडेन आपणे चर्चा केल्या. पावस अजून सोंपूंक ना. पावसांत हॉटमिक्स केलें जाल्यार तें चड तेंप उरचें ना. दोन दिसां पयलीं लेगीत पावस पडला. हाका लागून काम करप शक्य नाशिल्लें, अशें भौशीक बांदकाम खात्याच्या अधिकाऱ्यांनी सांगलें. तशेंच स्मार्ट सिटी खाला क्रॉस ड्रेनींचीं कामां उरल्यात. पावसाक लागून हीं कामां लेगीत करपाक मेळना. हीं कामां चालू आसात. क्रॉस ड्रेनी पयलीं रस्ते दुरुस्त केले जाल्यार ते परतून खणचे पडटले. हाका लागून रस्त्यांचे दुरुस्तीक कळाव जाता, अशें नगरसेवक सँड्रा डिकुन्हा हांणी सांगलें. फोंडेंच्यान पणजे वचपी चडश्यो गाडयो पोरणे गोंय सावन म्हामार्गान वतात, तरी लेगीत पाटो, रायबंदराक वचपा खातीर रायबंदरच्याच रस्त्यांचो वापर करचो पडटा. हाका लागून रायबंदरच्या पेड्डेर रस्त्याचो फटको हजारांनी प्रवाशांक बसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
