भांगरभूंय | प्रतिनिधी
जायते जाण इंटरनॅटाचो आदार घेवन फुकट सिनेमा डावनलोड करतात. पूण हें खूब म्हारग पडूं येता. हालींच गूगलाच्या सायबर सुरक्षा फर्म Mandiant पीकलायट नांवाच्या मालवेयर हल्ल्याची शिटकावणी दिल्या. हो मालवेयर मुखेलपणान पायरेटेड सिनेमा डावनलोड करपी लोकांक लक्ष्य करता. ताच्या चपक्यांत पडल्यार लोकांक समस्या निर्माण जावंक शकतात आनी तांचे विंडोज संगणक आनी लॅपटॉप हॅक जावंक शकतात.
Peaklite एक धोक्याचो मालवेयर. तातूंत PowerShell स्क्रिप्ट आसता, जी संक्रमीत डिव्हायसांत मालवेयराची हाजेरी वाडयता. हाचे वांगडाच सायबर गुन्यांवकार संगणक आनी लॅपटॉपांत लुम्मा स्टीलर, हायजॅकर लोडर आनी क्रिप्टबॉट सारकिले धोक्याचे आनी हानीकारक प्रोग्राम स्थापन करूंक शकतात. हे प्रोग्राम सेवा म्हणून भाड्याक मेळटात, जाचे वरवीं सायबर हल्लेखोर तुमच्या संगणक-लॅपटॉपा वयल्यान संवेदनशील डेटा चोरूंक शकतात. हाचे भायर ह्या संगणक आनी लॅपटॉपाचेरूय नियंत्रण दवरपाक शकतात.
Mandiant हाच्या मतान पीकलायट संगणकाच्या मेमरींत काम करता. देखूनच तें धरप खूब कठीण, कारण हार्ड ड्रायवाचेर ताच्या हाजिरेचो कसलोच पुरावो सोडिना.
सायबर गुन्यांवकारांनी पीकलाइट मालवेयर पातळावपाक ‘फुकट सिनेमा डावनलोड’ वापरल्यात. हल्ल्या खातीर लोकप्रीय सिनेमाचे डावनलोड लिंक्स तयार करतात, जे झीप फोल्डर आसतात. तातूंत धोक्याची Windows शॉर्टकट फायली (LNKs) आसतात. जेन्ना लोक ह्यो फायली उगडटात तेन्ना आमंत्रण नाशिल्लो सोयरो म्हळ्यार Peaklight मालवेयर प्रणालींत भितर सरता आनी धोक्याचो खेळ सुरू जाता.
Peaklight मालवेयर रॅमांत रावन तुमचो म्हत्वाचो डेटा चोरपाक येता. इंटरनॅटाचेर फुकट सिनेमा पळोवपाक सिनेमा डावनलोड करपी लोकांक, ताचे परिणाम जावंक शकतात. देखून, जेन्ना तुमी इंटरनॅटा वयल्यान कितेंय डावनलोड करतात, तेन्ना तें विस्वासपात्र संकेतथळां वयल्यान वा स्रोतां वयल्यान डावनलोड करात, नाजाल्यार तुमी Peaklight सारकिल्ल्या मालवेयराक बळी पडूं येतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
