भांगरभूंय | प्रतिनिधी
मैहर, खबरां संस्था : मध्य प्रदेशांतल्या मैहर जिल्ह्यांत बस आनी ट्रकाच्या अपघातांत स जाणांक मरण आयलें. जाल्यार २० जाण जखमी जाल्ल्यात. बस प्रयागराज वेल्यान नागपूराक वताली, जाल्यार ट्रक महामार्गार उबो आशिल्लो. वतना नादान देहाट स्टेशना पुलीस ठाण्याच्या लागसारा हो अपघात घडलो. शेनवारा रातीं सुमार ११ वरांचेर फातरान भरिल्ल्या डंपर ट्रक आनी बसीचो धपको बसलो. ह्या भिरांकूळ अपघातांत स जाणांक जाग्यारूच मरण आयलें, जाल्यार २० जाण गंभीर जखमी जाल्यात. जखमी जाल्ल्यांक उपचारा खातीर हॉस्पिटलांत दाखल केलां.
मजगतीं, ह्या अपघातांत मरण आयिल्ल्यांचो आंकडो वाडपाची शक्यताय आसा. अपघातांची घडणूक घडल्या उपरांत घडणुके सुवातेर जिल्ह्यांतले वरीश्ट अधिकारी रोखडेच दाखल जाल्ले. ह्या अपघातांची म्हायती दितना मैहरचे पुलीस अधीक्षक सुधीर अग्रवाल हांणे सांगलें, स जखमींची भलायकी चिंता करपा सारकी आसा. तांचेर हॉस्पिटलांत उपचार चालू आसा. जाल्यार उरिल्ल्या लोकांचेर मैहर आनी अमरपाटणच्या हॉस्पिटलांत उपचार सुरू आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
