भांगरभूंय | प्रतिनिधी
वॅबबेस अॅप तयारः म्हयन्यांभरांत खात्याची सक्ती
भांगरभूंय । प्रतिनिधी
पणजीः गोंयांतल्या सहकारी बँकांचो कारभार आतां अदीक पारदर्शक जातलो. सहकारी बँको, सोसायटींच्या कारभाराचेर नदर दवरचे खातीर खात्यान वॅबबेस अॅप तयार केला. फुडल्या म्हयन्याभरांत ह्या अॅपाची अंमलबजावणी जातली, अशी म्हायती सहकार खात्यांतल्या गोपांनी ‘भांगरभूंय’ कडेन उलयतना दिली.
फाटल्या कांय वर्सांत गोंयांतल्यो सहकारी बँको, सोसायट्यो तशेंच पतसंस्थांतल्या थकीत रिणाचो आंकडो व्हड प्रमाणांत वाडला. ते भायर कांय सोसायट्यांनी संचालक मंडळा कडल्यानूच अर्थीक घोटाळो जाल्ल्याचीं प्रकरणां उजवाडाक आयल्यांत. हाचेर आळाबंद दरवचे खातीर वॅबबेस अॅप तयार करपाची प्रक्रिया खात्यान फाटल्या कांय म्हयन्यां सावन सुरू केल्ली. हें काम ‘एनआयसी’क दिल्लें. ते प्रमाण ‘एनआयसी’न अॅप तयार केला. म्हयन्याभरांत ताची सगळ्यो सहकारी बँको, सोसायट्यो, पतसंस्थांक सक्ती करतले, अशें गोपांनी सांगलें.
ह्या वॅबबेस अॅपाचें लॉगीन सहकारी बँको, सोसायट्यो, पतसंस्थांक दितले. ते प्रमाण तांकां दरेका म्हयन्याक बँकेंतल्यान दिल्लें रीण, रिणकारां कडल्यान जाल्ली परतफेड हाचे सयत ‘एनपीए’ खात्यांची म्हायती वॅबबेस अॅपाचेर लोड करची पडटली. सहकार निबंधक दरेका म्हयन्याक ह्या अॅपा वरवीं सगळ्यो बँको, सोसायट्यो, पतसंस्थांचे म्हायतीचो नियाळ घेतलो. हे प्रक्रियेक लागून सहकार खात्यांत आनीक पारदर्शकता येवपाक मजत जातली, तशेंच तांच्या कारभाराचेर नेमान नदर दवरपाक लेगीत मजत जातली, अशें गोपांनी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
