भांगरभूंय | प्रतिनिधी
एकल्याक तोंडाचो कांक्र, 12 लागण जावपाच्या आदल्या पांवड्यार
भांगरभूंय । प्रतिनिधी
पणजीः काणकोण म्हालांत किडणी उपरांत कांक्राचे दुयेती वाडपाक लागल्यात, अशें गोंय वैजकी म्हाविद्यालय हॉस्पिटलान (गोमॅकॉ) कॅन्सर स्क्रिनींग मोहिमे खाला शेनवारा केल्ले चांचणेंतल्यान दिसून आयलां. काणकोणच्या 90 दादल्यांची आनी 196 बायलांची तपासणी केली. तातूंत एकल्यात तोंडाचो कांक्र जाल्ल्याचें जाल्यार 12 जाण कांक्राची लागण जावपा कडेन पाविल्ल्याचें स्पश्ट जालें.
गोमॅकॉन फाटल्या कांय दिसां सावन मोबायल कॅन्सर डिटेक्शन व्हॅनीच्या माध्यमांतल्यान कॅन्सर स्क्रिनींग मोहीम सुरू केलां. ते खाला मंडूर, वाळपय, कुडचडें आनी सांखळी ह्या चार कडेन फाटल्या कांय दिसांत ही मोहीम चालीक लायिल्ली. तातूंत 769 जाणांची फुकट तपासणी केल्ली. तातूंतल्या एकल्याक तोंडाचो जाल्यार एके बायलेक थानाच्या कांक्राची लागण जाल्ल्याचें स्पश्ट जाल्लें. तशेंच ह्या चार वाठारांतले 30 जाण कॅन्सराची लागण जावपाच्या आदल्या पांवड्यार आशिल्ल्याचें, तातूंतले 24 जाण तोंडाच्या कॅन्सरा कडेन संबंदीत, जाल्यार 6 जाणां थानाच्या कॅन्सरा कडेन संबंदीत आशिल्ल्याचेंय उक्तें जालां.
गोमॅकॉन शेनवारा ही मोहीम काणकोण म्हालांत चालीक लायली. तातूंत वट्ट 286 जाणांची फुकट तपासणी केली. त्या वेळार कल्याक दुसरे खेपे तोंडाचो कांक्र जाल्ल्याचें, जाल्यार 12 जाण विवीध तरेचो कांक्र जावपाच्या आदल्या पांवड्यार आशिल्ल्याचें मुखार आयलां, अशें गोमॅकॉच्या कम्युनिटी विबागाचे मुखेली डॉ. जगदीश काकोडकार हांणी ‘भांगरभूंय’ कडेन उलयतना सांगलें. तशेंच गर्भाशयाच्या कांक्रा संबंदांत 71 बायलांचें नमुने गोमॅकॉन तपासणी खातीर घेतल्यात, अशेंय तांणी स्पश्ट केलें.
मुत्रापिंडा संबंदीत 31 जाणांचें नमुने तपासणे खातीर
काणकोण म्हालांत 442 लोकां फाटल्यान एकलो मुत्रपिंडा कडेन संबंदीत दुयेंसान पिडीत आशिल्ल्याचें फातोड्ड्याचे आमदार विजय सरदेसाय हांणी पावसाळी अधिवेशनांत सरकाराचे नदरेक हाडून दिल्लें. तातूंत गोमेकॉन कांक्रा संबंदांत केल्ले तपासणे वेळार मुत्रपिंडा कडेन संबंदीत 31 जाणांचे नमुने तपासणे खातीर घेतिल्ल्यान लोकां मदीं हुस्क्याचें वातावरण पातळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
