भांगरभूंय | प्रतिनिधी
उत्तम पार्सेकारः अभियंत्यांक नोटिशेक जाप दिवपाक आठ दिसांची मुजत
भांगरभूंय । प्रतिनिधी
पणजीः गोंयांतल्या सगळ्याच रस्त्याची नोव्हेंबराचे अखेर मेरेन दुरुस्ती करतले. ते उपरांत डिसेंबर सावन हॉटमिक्स डांबरीकरण सुरू जातलें. 30 अभियंत्यांक दोन दिसां आदींच कारणां दाखयात नोटीस जारी केल्या. तांकां जाप दिवचे खातीर आठ दिसांची मुजत दिल्या, अशी म्हायती भौशीक बांदकाम खात्याचे प्रधान मुख्य अभियंते उत्तम पार्सेकार हांणी शेनवारा ‘भांगरभूंय’ कडेन उलयतना दिली.
रस्त्यांच्या निकृश्ट दर्ज्या खातीर मुख्यमंत्री डॉ. प्रमोद सावंत हांणी कंत्राटदार आनी अभियंत्यांचेर पयलेच खेपे कारवायेची बडी उबारल्या. ते खातीर भियेल्ले कंत्राटदार आनी अभियंत्यांनी रस्त्यांचे दुरुस्ती विशीं गांभिर्यान विचार सुरू केला. गोंयांत अजून लेगीत मदीं मदीं मान्सूनच्या पावसाचो दडको पडटात. पावसाचें प्रमाण उणें जाताच सगळ्याच निकृश्ट रस्त्यांची नोव्हेंबराचे अखेर मेरेन दुरुस्ती करतले. ते उपरांत तत्काळ हॉटमिक्स डांबरीकरण सुरू जातलें, अशें पार्सेकार हांणी सांगलें.
मजगतीं, गोंयांतल्या निकृश्ट रस्त्यां खातीर सरकारान 27 कंत्राटदारांक कांय दिसां आदीं कारणां दाखयात नोटिसो जारी केल्यात. त्याच वेळार अश्या रस्त्यांक जापसालदार आशिल्ल्या अभियंत्यांचेर लेगीत कारवाय करपाची हमी मुख्यमंत्री डॉ. प्रमोद सावंत हांणी दिल्ली. ते प्रमाण दोन दिसां उपरांत 30 अभियंत्यांक लेगीत कारणां दाखयात नोटीस जारी केल्या आनी जापे खातीर आठ दिसांची मुजत दिल्या.
दोन म्हयन्यां उपरांत रस्ते फोडपाक मेळचे नात
रस्त्यांची दुरुस्ती करपाक भौशीक बांदकाम खात्या कडेन अजून दोन म्हयन्यांचो वेळ आसा. ह्या काळांत वीज, उदका स्रोत खात्यांनी रस्ते फोडून भुंयगत कॅबलांचीं, उदकाचीं पायपां घालपाचीं कामां पुराय करून घेवचीं, अशे निर्देश तांकां दिल्यात. दोन म्हयन्यां उपरांत कोणाकूच रस्ते फोडपाक दिवचे नात, अशेंय पार्सेकार हांणी स्पश्ट केलें.
मजगतीं, भौशीक बांदकाम खात्याच्या रस्तो विभागाच्या अभियंत्यांक हे आदीं कोणाचोच भंय नाशिल्लो. ताका लागून कंत्राटदारांक लागीं धरून मनमानी कारभार तांणी चालू दवरिल्लो. ताचो मार सर्वसामान्य लोकांक बसतालो. ही गजाल लक्षांत घेवन मुख्यमंत्र्यान तांचेर बडी मारिल्ल्यान हे मुखार ते जाग्यार येतले, अशी प्रतिक्रिया सर्वसामान्य लोक उक्तायतात.
अभियंते भियेल्यात…
अभियंत्यांची दक्षता खात्या वतीन चवकशी करून दोशी थारिल्ल्यांची वेतनवाड आनी बडट्यो आडायतले, अशें मुख्यमंत्री डॉ. प्रमोद सावंत हांणी स्पश्ट केलां. इतिहासांत पयलेच खेपे कंत्राटदारां सयत भौशीक बांदकाम खात्याच्या अभियंत्यांचेर कारवाय जाल्या. तशेंच हे मुखार कंत्राटदार दोशी थारले जाल्यार अभियंते आनी अभियंते दोशी थारले जाल्यार कंत्राटदार कारवायेंतल्यान सुटचे नात, अशी थेट शिटकावणी मुख्यमंत्र्यांनी दिल्ल्यान रस्ते कंत्राटदारा वांगडाच अभियंतेय भियेल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
