भांगरभूंय | प्रतिनिधी
गोंय राज्य प्रदुशण नियंत्रण मंडळाक अहवाल दिवपाचे निर्देश
वास्को, प्रतिनिधी ः सांकवाळच्या बांदोळें तळ्यांतल्या तशेंच भोंवतणच्या गटारांत जाल्ल्या उदका प्रदुशणाची दखल घेवन कुठ्ठाळी आमदार आंतोनियो वास हांणी बुधवारा (25 तारखेक) सांकवाळ पंचायतीच्या सामुग्री वसुली सुविधा आनी कोयर प्रक्रिया प्रकल्पाक अचकीत भेट दिली. ह्या वेळार तांचे वांगडा गोंय राज्य प्रदूशण नियंत्रण मंडळाचे सिद्धेश देसाय आनी साहिल हजर आशिल्ले. ह्या प्लांटांतल्या उदकाचे नमुने घेतल्यात. ते संबंदी मंडळ एका सप्तका भितर अहवाल सादर करतलें. उपरांतच फुडली कारवाय जातली अशें आमदार वास हांणी सांगलें.
सिंदोळी- सांकवाळ वाठारांतल्यान व्हांवपी गटारांतल्या उदकाच्या दुर्गंधाक लागून लोकांक खूब त्रास सोंसचे पडटात. तशेंच थंयच्या बांदोळें तळ्याचें उदक पिड्ड्यार जालां. ह्या गटारांतल्यान व्हांवपी कोयर आनी घाणयारे उदक तळ्यांतूच सांठून उरलां. आमदार वास हांणी जुआरीनगरांतल्या सांकवाळ पंचायतीच्या मटेरियल रिकव्हरी सुविधा केंद्र आनी कोयर प्रक्रिया केंद्राक अचकीत भेट दिली. त्या वेळार थंय प्रक्रिया जावंक नाशिल्ल्या कोयराची रास मेळ्ळी. ह्या केंद्रा पसून धा किलोमीटर पयस आशिल्ल्या गटारांत प्रदुशीत उदक, घाणयारे उदक व्हांवतालें ताची पळोवणी केली. हें उदक गटारांतल्यान तळयेंत आनी उपरांत जुआरी न्हंयेंत वता.
तपासणे वेळार थंय कंत्राटदार नाशिल्ल्याचें हाजीर आशिल्ल्या एका मनशान सांगलें. कंत्राटदाराची नेमणूक जावंक नाशिल्ल्यान थंयचीं कामां कोण पळयता तें स्पश्ट जावंक ना. कोयर प्रक्रिया प्रकल्पांतल्या व्हडले कुडींत खाटी, सोफा सेट आनी हेर वस्तू सांपडल्यात. हाचो अर्थ थंय कोण तरी रावता हें स्पश्ट जालें. पूण ते कोण हो प्रस्न आसा. उल्लेख केल्ली कुड कोयर प्रक्रिया करपा खातीर बांदिल्ली. पूण ताचो उपेग चुकीच्या गजाली खातीर जावपाक लागला. देखून पुराय पळोवणी उपरांत हे संबंदी अहवाल बेगोबेग कार्यालयांत धाडपाची सुचोवणी आमदार वास हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
