मोरजे पंचायत वाठारांत पार्किंगाची समस्या
भांगरभूंय | प्रतिनिधी
पेडणें, प्रतिनिधी ः मोरजें पंचायत वाठारांत तीन किलोमीटर लांब दर्यादेग आशिल्ल्यान हो गांव पर्यटनाक म्हत्वाचो आसा. दर वर्सा देशी-विदेशी पर्यटक व्हड प्रमाणांत ह्या वाठारांक भेट दितात. हांगाचे रस्ते आदींच अरुंद आनी त्या रस्त्यांचे कुशीक वेगवेगळी बांदकामां करुन हॉटेल, रेस्टॉरंट, दुकाना उबारतात. पूण थंय येवपी लेकांक तांच्यो गाडयो पार्क करपाक पार्किंगाची वेवस्था नासता. ताका लागून गिरायक भितर सरले उपरांत गाडयो रस्त्या कुशीक पार्क करुन वतात. हाका लागून ह्या वाठारांत व्हड प्रमाणात येरादारीची कोंयडी जाता. हाचेर पंचायत मंडळां आनी पेडणें येरादारी पुलिसांनी योग्य दखल घेवन पार्किंग झोन नाशिल्ल्या विभागांनी आनी चुकीच्या पद्दतीन गाडयो पार्क करतात तांचे आड कारवाय करपाचजी गरज आसा.
मोरजे पंचायत वाठारांतल्या विठ्ठलदास वाडो, नवो वाडो, गावडेवाडो वाठारांनी नो पार्किंग झोन जाहीर केल्यात. त्या पंचायतीन फुडाकार घेवन त्या जाग्यार नो पार्किंग तकते लायलें. पूण जंय नो पार्किंग तकते लायिल्लें आसतात तेच सुवातेर गाडयो पार्क करुन दवरतात आनी ताचो परिणाम येरादारीचेर जाता.
मजगतीं, पर्यटन हंगाम आसूं वा नासूं, दर्यादेगेवेल्या वाठारांक भेट दिवपी पर्यटक आसूं, वा हेर देशांतले कांय नागरिक आपली खाजगी वाहनां घेवन येतात जांकां नंबर प्लेट लेगीत नासतात. अशीं वाहनां दर्यादेगेवेल्या वाठारांनी व्हड प्रमाणात येरादारी करतना दिसतात. हाका लागून येरादारी पुलिसांनी हाचेर कारवाय करपाची अशी मागणी नागरीक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
