भांगरभूंय | प्रतिनिधी
दोग नेण्ट्यां भुरग्यां सयत चवगांक अटक
भांगरभूंय । प्रतिनिधी
म्हापशें: म्हापशेंच्या बाजारांत आशिल्ल्या चंद्रमोहन नास्नोडकार हांच्या ‘नास्नोडकर ज्वेलर्स’ ह्या दुकानांत चोरी जाल्ली. ह्या प्रकरणांत म्हापशें पुलिसांनी दोगां नेण्ट्यां सयत चार जाणांक सिंधुदुर्गांतल्यान अटक केली. म्हत्वाचें म्हणल्यार तांचे कडेन 10 कील रुपें तशेंच 1 कील भांगराच्यो वस्ती जप्त केल्यो. ह्या सगळ्या म्हालाचें मोल एक कोटी परस चड आशिल्ल्याचें मुखार आयलां.
ही घडणूक घडिल्ल्याचें कळटांच पुलिसांक दुबावितांची सीसीटीव्ही फुटेजीचे मजतीन वळख पटली. ते प्रमाण पुलिसांचे पंगड महाराष्ट्र आनी कर्नाटकांत धाडले. मजगतीं, दुबावीत सिंधुदुर्ग जिल्ह्यांत आशिल्ल्याची म्हायती मेळ्ळे उपरांत ह्या पंगडान हरजी चौहान (26. अजमेर राजस्थान), भवानी सिंह (18. अजमेर राजस्थान) हांचे वांगडा दोग नेण्ट्या भुरग्यांक ताब्यांत घेतले. तांचे कडेन भांगर आनी रुपें मेळ्ळे उपरांत त्या चवगांनीय ही चोरी केल्ल्याचें स्पश्ट जालें. पुलिसांनी तांकां अटक केली. सध्या त्या दोगांय नेण्ट्या भुरग्यांक अपना घरांत धाडल्यात. हेर दोगांक म्हापशें पयलो वर्ग न्यायालयांत रिमांडा खातीर हजर केल्यात.
मेळिल्ले म्हायती प्रमाण, आयतारा 22 तारखेक रातच्या सुमार 12 ते 2 वरां मजगतीं चार चोरांनी नास्नोडकर ज्वेलर्स ह्या दुकानांत चोरी केल्ली. ह्या दुकानां मदले तीग जाण दुकानांत भितर सरिल्ले. जाल्यार चवथो दुकाना भायर नदर दवरपा खातीर आशिल्लो. चोरी केले उपरांत दोन कपड्यांच्या पोतयांनी दुकानांतलो म्हाल भरून दुबावीत बाजारांतल्यान चलत महारुद्र देवळा मेरेन गेल्ल्याचें थंयच्या एका दुकानांतले सीसीटीव्हींत कैद जाल्लें. मजगतीं म्हापशें पुलिसांनी चंद्रमोहन नास्नोडकार हांचे फिर्यादी प्रमाण भारतीय न्याय संहितेच्या कलम 331 (4), 305 (अ) आनी 3(5) खाला गुन्यांव नोंद करून तपास सुरू केल्लो.
मजगतीं, ह्या चोरांक सोदपा खातीर म्हापशें पुलिसांनी चार तपास पंगडांची नेमणूक केल्ली. हातूंत उपनिरिक्षक, हवालदार आनी कॉन्स्टेबल मेळून बारा ते पंदरा जाणांचो आस्पाव आशिल्लो. तशेंच दुबावितांक धरपा खातीर पुलीस अधिक्षक अक्षत कौशल, उपअधिक्षक संदेश चोडणकार आनी निरिक्षक निखील पालेकार हे वयल्या पंगडांक गरजेचें मार्गदर्शन करताले.
ह्या चोरां मेरेन पावपा खातीर म्हत्वाची भुमिका केल्ल्या पुलीस पंगडा सयत गोंयचे अधिक्षक अक्षत कौशल हांणी सोमारा दनपरां पत्रकार परिशद घेतली. ह्या वेळार रातपाळीचे गस्तीक लागूनच ह्या चोरांक धरले अशें म्हणून अधिक्षक अक्षत कौशल हांणी म्हापशें पुलिसांची तोखणाय केली. कौशल हांणी दिल्ले म्हायती प्रमाण, म्हापशें पुलिसांनी २३ सप्टेंबराक सकाळच्या सुमार ३ वरांचेर धरिल्ल्या दोगांक दुबावान हटकिल्लें. तांकां कांय प्रस्न विचारून तांचेय फोटोय काडिल्ले. ह्या फोटवां वरवीं पुलीस चोरां मेरेन पावले अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
