भांगरभूंय | प्रतिनिधी
– उदका पुरवण मंत्र्यांनी मागलो अतिक्रमणांचो अहवाल
– इकरा वर्सा उपरांत काडाची बसका
भांगरभूंय । प्रतिनिधी
पणजी : तिळारी धरण लागवड वाठारांत (काडा) व्हड प्रमाणांत अतिक्रमणां जावन बांदकामां उबीं रावल्यांत. हातूंत कांय वेवसायीक बांदकामां आसात. काडा जमनीर जाल्लीं अतिक्रमणां तशेंच बांदकामांचो अहवाल काडाचे अध्यक्ष ह्या नात्यान उदका पुरवण खात्याचे मंत्री सुभाष शिरोडकार हांणी मागला. गोपा कडल्यान ही म्हायती मेळ्ळ्या.
तिळारीच्या उदकाचो वापर हो प्राधान्यान शेती खातीर जावपाक जाय. काडा (कमांड एरिया डॅव्हलोपमेंट अॅथोरिटी) खाला उत्तर गोंयांत 14,500 हॅक्टर जमीन आसा. हे जमनीचो शेती खातीर चडांत चड वापर जावपाक जाय. अतिक्रमणां वा बांदकामांक थारो दी नासतना शेती वाडोवपा विशीं बसकेंत चर्चा जाली, अशी म्हायती उदका पुरवण खात्याचे मंत्री सुभाष शिरोडकार हांणी बसके उपरांत दिली.
काडाची बसका थारावीक वेळांत जावपाक जाय. बिरेस्तारा मंत्रालयांत इकरा वर्सां उपरांत बसका जाली. हे बसकेक दिवचलचे आमदार डॉ. चंद्रकांत शेट्ये, मयेंचे आमदार प्रेमेंद शेट, हळदोणेंचे आमदार अॅड. कार्लोस फेरेरा, पेडणेंचे आमदार प्रवीण आर्लेकार, उदका पुरवण खात्याचे मुखेल अभियंते प्रमोद बदामी तशेच हेर वांगडी हाजीर आशिल्ले.
तिळारीच्या उदकाची पुरवण पेडणें, बार्देस, दिवचल ह्या म्हालांनी जाता. पुराय उत्तर गोंयांत मेळून 14,500 हॅक्टर शेत जमीन लागवडी खाला हाडपाचें उद्दीश्ट आशिल्लें. इतली जमीन शेती खाला येवंक ना. कांय जमीन पडीक आसा. कांय जमनीचेर अतिक्रमणां जावन बांदकामां तयार जाल्यात. बसकेक शेती तशेंच आयसीएआरचे अधिकारी हाजीर आशिल्ले. काडा जमनीचो वापर फक्त शेती/ बागायती खातीर जावपाक जाय. हेर कामां खातीर वापर जावपाक जायना. काडा जमनीचेर जाल्लीं अतिक्रमणां, वेवसायीक बांदकामां तशेंच हेर कामां खातीर कितली जमीन गेल्या, ताची म्हायती मंत्र्यांनी मागल्या. फुडले बसकेंत अहवाल आयले उपरांत फुडली प्रक्रिया जातली.
चडांत चड जमीन शेती खाला हाडपा खातीर बियाणी दिवपा सयत येवजणेची आंखणी जातली. हे फुडें अतिक्रमणां वा बांदकामां जावपाक जायना, म्हूण उपाय येवजण करतले, अशें मंत्री सुभाष शिरोडकार हांणी सांगलें.
तिळारीच्या काडा जमनीचेर अतिक्रमणां जावप ही गंभीर गजाल आसा. हीं अतिक्रमणां कोणी करपाक दिलीं, हाचो विचार जावपाक जाय. कोणीं घरां बांदलीं आसत, जाल्यार तांची बाजू आयकून घेवपाक जाय. तांचे पुनर्वसनाचो विचार जावपाक जाय, अशी मागणी बसकेंत केल्ल्याचें दिवचलचे आमदार डॉ. चंद्रकांत शेट्ये हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
