भांगरभूंय | प्रतिनिधी
राघोबा कामतः देवळांचे सुरक्षे खातीर बसका
भांगरभूंय । प्रतिनिधी
फोंडें: कुळें पुलीस स्टेशनाचे हद्दींत खूबशीं देवळां आसात. देवळाचे सुरक्षे खातीर देवस्थान समिती कडल्यान आदाराची गरज आसा. देवळाच्या निधींतल्यान देवळांत सीसीटीव्ही कॅमेरे बसोवचे, अशें कुळें पुलीस स्टेशनाचे निरिक्षक राघोबा कामत हांणी सांगलें.
कुळें पुलीस स्टेशनाचे हद्दींत येवपी विवीध देवळांचे सुरक्षे खातीर कुळें पुलीस स्टेशनाचे निरिक्षक राघोबा कामत हांणी दखल घेवन जागृताय करचे खातीर खाशेली बसका घेतली. वाठारांतल्या विवीध देवस्थान समितीच्या पदाधिकाऱ्यां वांगडा देवळांचे सुरक्षे संबंदांत चर्चा केली.
रातच्या वेळार दरेका देवळा कडेन पुलीस गस्त घालतले. पुलीस कर्मचारी देवळांत वचून थंय आशिल्ले चोपडेचेर सय करतले. हे आदीं देवळांची अज्ञातां कडल्यान मोडतोड जाल्या. तशेंच फंडपेटी लेगीत फोडपाच्यो घडणुको घडल्यात. फुडारांत कसलेय तरेची घडणूक कुळें पुलीस स्टेशनाचे हद्दींत घडची न्हय हे खातीर सगळ्यांच्या आदाराची गरज आसा, अशें कामत हांणी सांगलें. बसकेंत श्री आजोबा देवळाचे अध्यक्ष एकनाथ उत्तम खेडेकार, श्री महामाया देवस्थानचे अध्यक्ष मनीष लांबोर, श्री दुदसागर देवस्थानचे जानू दमेकार, ठको पांढरो मिसाळ, मारियम्मा देवस्थानचे नितेश नायक, चांदोबा देवस्थानचे देवेंद्र नायक, रजत खांडेपारकार, श्री साईबाबा देवस्थानचे कल्पेश खांडेपारकार, श्री संतोषी माता देवस्थानचे साक्षी पटकारो हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
