भांगरभूंय | प्रतिनिधी
संकल्प आमोणकारः एमपीए लोकांक भेश्टोवपाक सोदता असो दावो
भांगरभूंय । प्रतिनिधी
वास्कोः मुरगांव पतन प्राधिकरणान (एमपीए) मुरगांवच्या लोकांची सतावणूक बंद करची. तशेंच ज्या जमनीचो एमपीएक कसलोच फायदो ना, थंयचीं घरां मोडप चुकीचें आसा. जर थंयच्या घरांचेर कारवाय केली जाल्यार ताचे गंभीर परिणाम एमपीएक भोगचे पडटले, अशी शिटकावणी मुरगांवचे आमदार संकल्प आमोणकार हांणी दिल्या.
मुरगांव बोगदा- तारीवाडो भारत लायन वाठारांतल्या चार घरांचें जे मेरेन पुनर्वसन जायना ते मेरेम एमपीए धरून खंयच्या विभागाक त्या घरांचेर कारवाय करपाक दिवचों ना, अशें आमोणकार हांणी म्हणलां.
मुरगांव बोगदा तारीवाडो भारत लायन वाठारांतल्या घरांचेर कारवाय केली जाल्यार एमपीए आड सगळ्यांत पयलीं आपूण उबो रावतलों. पुराय सडा वाठाराचेर एमपीए आपलो हक्क सांगता आनी थंयच्या लोकांक भेश्टोवपाचें कारस्थान रचता एमपीए आदीं अशी नाशिल्ली. आदीं एमपीए मुरगांवच्या लोकांक वेवसाय, नोकऱ्यो दिताली. पूण अचकीत एमपीए सडा, हार्बर, बोगदा, तारीवाड्या वयले जमनीचेर आपलो हक्क सांगता. हर्बरच्या लोकांनी न्यायालयांत लढो दिवन त्यो जमनी आपल्यो हें सिद्ध केलें. तरी लेगीत एमपीए हार्बरच्या लोकांक थंयच्या देवळाचेर कारवाय करपाची धमकी दिता, अशें आमोणकार हांणी सांगलें. सडा, बोगदा तारीवाडो आनी हार्बरच्या लोकांची सतावणूक एमपीएन बंद करची ना जाल्यार ताचे गंभीर परिणाम भोगचे पडटले, अशेंय तांणी स्पश्ट केलें.
एमपीएंतल्या कोळसो प्रदुशणाक लागून सडा, जेटी, बोगदाचे लोक बेजारल्यात. एमपीएचें प्रदुशण आमी खूब वर्सां सावन सोंसतात. हे मुखार एमपीएची दादागिरी मुरगांवचे लोक सोंसून घेवचे नात, अशें आमोणकार हांणी सांगलें.
मुरगांव बायणा दर्यादेगेर आशिल्ल्या सुलभ शौचालयाच्या नुतनीकरणाचें काम भौशीक बांदकाम भूंगटार विभागा खाला करतले. ह्या शौचालयाच्या नुतनीकरणाचें काम दोन पांवड्यांचेर करतले. ह्या शौचालयांत बायलो आनी दादल्यां खातीर वेगवेगळे शौचालय आसतले. ह्या शौचालयांत दिव्यांगा खातीर वेगळो शौचालय आसतलो. न्हांवपाक वेगळो बाथरूम आनी मिटींग रूम लेगीत थंय बांदतले. बायणा दर्यादेगेर आशिल्ल्या सुलभ शौचालयाच्या नुतनीकराच्या कामाच्या उक्तावण सुवाळ्याक आमदार आमोणकार हांचे वांगडा नगरसेविका श्रद्धा आमोणकार, भौशीक बांदकाम भूंगटार विभागाचे सहाय्यक अभियंते वरद सुर्लेकार, कनिश्ठ अभियंता अदिती सरदेसाय, चंद्रहास पांढऱे आनी थळावे लोक हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
