भांगरभूंय | प्रतिनिधी
मुख्यमंत्री : सांखळे मनयली पं. दिनदयाळ उपाध्याय जयंती
भांगरभूंय । प्रतिनिधी
दिवचलः राजकारण हें समाजा खातीर काम करून समस्या सोडोवचे खातीर करपाचें आसता. समाजांतल्या निमाण्या घटका मेरेन रस्तो, वीज, उदक आनी हेर मुळाव्यो गरजो पावोवपा खातीर सरकारान काम करपाचें आसता. पं. दिनदयाळ उपाध्याय हांच्याच विचारांतल्यान ह्या सरकाराचें काम चल्लां, अशें मुख्यमंत्री डॉ. प्रमोद सावंत हांणी सांगलें.
सांखळी भाजप कार्यालयांत पं. दिनदयाळ उपाध्याय हांची जयंती मनयली. ह्या वेळार मुख्यमंत्री उलयताले. तांचे वांगडा नगराध्यक्ष सिद्धी प्रभू परोब, उपनगराध्यक्ष आनंद काणेकार, नगरसेवक दयानंद बोर्येकार, हरवळेचे पंच संजय नायक, सुदेश काणेकार, सातू माईणकार, संदेश गोवेकार आनी हेर मानेस्त हाजीर आशिल्ले.
अंत्योदय तत्वाचेर काम करपाची प्रेरणा दिवपी पं. दिनदयाळ हांच्या मार्गदर्शना प्रमाण केंद्रांतलें आनी राज्यांतलें भाजप सरकार अंत्योदय तत्वाचेर काम करून समाजांतल्या निमाण्या घटका मेरेन पावता. ही व्हड उपलब्धी आसा. हो वावर म्हणल्यारूच पं. दिनदयाळ हांकां खरी आर्गां थारतलीं, अशें मुख्यमंत्र्यान सांगलें. मुख्यमंत्री डॉ. सावंत हांचे हस्तुकीं पं. दिनदयाळ हांचे प्रतिमेक फुलांचो हार घालून आनी दिवली पेटोवन कार्यावळीचें उक्तावण केलें. ह्या वेळार हाजीर आशिल्ल्यांनी पं. दिनदयाळ हांकां फुलां ओंपलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
