भांगरभूंय | प्रतिनिधी
दिलीप धारगळकार: कोरगांवां कमलेश्वर उच्च माध्यमिकांत हिंदी दीस मनयलो
कोरगांव: हिंदी भाशा ही दरेक भारतीयांच्या काळजांतली भाशा आसा. भारतीयांक ती एकठांय दवरता. हे भाशेचो अभिमान दरेकाक आसूंक जाय. तिचो भोवमान करूंक जाय अशें म्हापशें सेंट झेवियर उच्च माध्यमीक विद्यालयाचे निवृत्त प्रा. दिलीप धारगाळकार हांणी सांगलें.
कोरगांवां श्रीकमलेश्वर उच्च माध्यमीक विद्यालयांत हिंदी दिसा निमतान आयोजीत केल्ल्या हिंदी गीत गायन सर्तीच्या इनामां भेटवण सुवाळ्याक ते मुखेल सोयरे म्हूण उलयताले.
कार्यावळीच्या अध्यक्षस्थानार श्रीकमलेश्वर शिक्षण प्रसारक संस्थेचे अध्यक्ष परशुराम गावडे हाजीर आशिल्ले. तशेंच माचयेर संस्थेचे भांडारी नीळकंठ थळी, सर्तीचे प्रायोजक स्टार इव्हेन्ट साळगांवचे धनी प्रदीप सावंत, सर्तीचे परिक्षक समीर शेट्ये, प्राचार्य जुही थळी, हिंदी शिक्षक विठोबा बगळी बी मानेस्त हाजीर आशिल्ले.
मुखार उलयतना प्रा. धारगळकार हांणी म्हणलें, हिंदी भाशेचो विस्तार आयज देशाच्या खांची कोनशांनी जाला. विद्यार्थ्यांनी हे भाशेचो आदार करतना हिंदी भाशेच्या विस्तारा खातीर आयोजीत केल्ले सर्तींनी वांटो घेवंक जाय अशें तांणी म्हणलें.
संस्थेचे भांडारी नीळकंठ थळी हांणी हिंदी भाशेचे म्हत्व सांगून कविता सादर केली.
ह्या वेळार घेतिल्ले हिंदी गीतगायन सर्तींत सिद्धांत गोंधळी (पयलो) संमेश गावडे (दुसरो) तनीश गावडे (तिसरो) ज्योती गावडे (उमेद वाडोवपी पयलें) सानिका कोरगावकर (दुसरें) हांकां इनामां भेटयलीं.
प्रा. दिलीप धारगळकार, प्रदीप सावंत, समीर शेट्ये हांणी सर्तीचें परिक्षक म्हूण काम पळयलें. मानेस्तांचे हस्तुकीं जैतिवंतांक खासा यादस्तीक भेटयलीं.
तेजस हरमलकार हाका प्रशांत गावडे हांणी खासा इनाम भेटयलें. हे सर्तींत सारिका कोरगांवकार, आशीश राव, तनीश गावडे, बिंदिया ठाकूर, संमेश गावडे, ज्योती गावडे, तेजस हरमलकार, सानिका देवूस्कार, भार्गव गावडे, अपर्णा अडेलकार, समीक्षा मुळगांवकार, निधी महाले, दिशा परब, सिद्धांत गोंधळी, सलोनी महाले, दक्ष पोळजी, अनिशा हळदणकार आनी काजल माळगीमनी हांणी वांटो घेतलो.
तशेंच परिक्षक समीर शेट्ये आनी मकबूल माळगीमनी हांणी हिंदी पदां सादर करून कार्यावळीक उमेद हाडली. विद्यार्थिनींनी मानेस्तांक फुलांची रोंपा दिवन येवकार दिलो.
सुरवेक मानेस्तांचे हस्तुकीं दिवली पेटोवन कार्यावळीची सुरवात केली. विठोबा बगळी हांणी प्रास्तावीक केलें. कु. काजल माळगीमनी आनी कु. अनिशा हळदणकार हांणी सुत्रसंचालन केलें. प्राचार्य जुही थळी हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
