भांगरभूंय | प्रतिनिधी
पणजी: अखील भारतीय कोंकणी साहित्य परिशद, मंगळूर हांचे तिसरें चारोळी संमेलन आयतार 22 सप्टेंबर ह्या दिसा गोवा कला आनी संचानालयाच्या सभघरांत जालें. चारोळी संमेलन अखील भारतीय कोंकणी परिशद मंगळूर तशेंच गोवा कला आनी संस्कृती संचानालयाच्या जोड पालवान ‘उगतें मळब’ हें संस्थेन घडोवन हाडलें. ही कार्यावळ चार सत्रांनी आयोजीत केल्ली.
ह्या संमेलनाची सुरवात मानेस्तांच्या हातांतल्यान दिवली पेटोवन जाली. पयल्या सत्रांत माचयेर मुखेल सोयरे म्हूण साहित्यीक आनी गोंय विद्यापिठाचे प्राध्यापक डॉ. प्रकाश पर्येंकार हाजीर आशिल्ले. गोवा कला आनी संस्कृती संचालनालयाचे संचालक सगूण वेळीप मानाचे सोयरे म्हूण, जाल्यार साहित्यीक उद्देजक आनी समाजसेवक गुरूदास नाटेकार खासा निमंत्रीत म्हूण हाजीर आशिल्ले. उगतें मळब हे संस्थेचे अध्यक्ष विवेक पिसुर्लेंकार आनी कवी, गीतकार आनी कलाकार गौरीश वेर्णेंकार, अ. भा. कों, सा. परिश्देचे अध्यक्ष रेमंड डिकुन्हा ताकोडे तशेंच निलबा खांडेकार, साहित्य अकादेमी पुरस्कार जैतिवंत हांचींय माचयेर हाजेरी आशिल्ली.
सुरवेक अनघा कामत हांणी मानेस्तांक तशेंच हाजीर आशिल्ल्यांक येवकार दिलो आनी मानेस्तांची वळख करून दिली. ह्यावेळार मानेस्तांक नामदेव सुर्लिकार आनी अपर्णा गारुडी हांणी फुलां भेटयलीं. उगतें मळब हे संस्थेचे अध्यक्ष विवेक पिसुर्लेंकार हांणी आपल्या प्रास्ताविकांत म्हणलें, ह्या वर्सा स. मनोहरराय सरदेसाय हांची जल्मशती गोंयांत मनयतात. ते निमतात ही कार्यावळ तांचे यादीक ओंपतात. येदी व्हडली कार्यावळ आमी घडोवन हाडटात ही आमचे खातीर खूब अभिमानाची गजाल आसा.
गोंयांत चारोळी बरोवपाची सुरवात स. मनोहरराय सरदेसाय सारकिल्ल्या बरोवप्यांनी केली. तांचीच स्फूर्त घेवन आपणें चारोळी बरोवपाक सुरवात केली आनी आतां दिसाक एक तरी चारोळी नित्यनेमान बरयतांच अशें रेमंड डिकुन्हा हांणी आपल्या उलोवपांत सांगलें.
उगतें मळब सारकिल्ल्यो संस्था कोंकणी खातीर बरें काम करतात आनी अश्या कामां खातीर आमचो सदांच तेंको आसतलो अशें सगूण वेळीप हांणी म्हणलें.
गुरुदास नाटेकार हांणी सांगलें, आयजकाल चारोळी खूब गाजता आनी आयचे कवी अश्या संमेलनांनी व्हड संख्येन वांटो घेतात अशें सांगून तांणी खोस उक्तायली.
ह्या वेळार गौरीश वेर्णेंकार आनी निलबा खांडेकार हांणीय आपलीं थोडक्यांत उलोवपां केलीं. उपरांत उदय म्हांबरो आनी नवीन पिरेरा हांचो मानेस्तां वरवीं शाल श्रीफळ मानचिन्न आनी मानपत्र भेटोवन भोवमान केलो.
ह्या वेळार अपर्णा गारुडी हांणी उदय म्हांबरो हांची वळख करून दिली जाल्यार सुनील पालकार हांणी नवीन पिरेराची वळख करून दिली. उपरांत दोनूय भोवमान मुर्तीनी आपले विचार उक्तायले.
मुखेल सोंयरे डॉ. प्रकाश पर्येंकार हांणी चारोळी ह्या विशयाचेर खुबशी म्हायती दिली. चारोळी ह्या प्रकाराक हुमलां. पिसुंदरां, कवनां, कवनुलां, तिकल्यो अशीं खूबशीं नांवां पयलीं सावनूच प्रसिध्द आसात अशें तांणी सांगलें. चारोळी ही काळजाच्या खरायेंतल्यान भायर सरता अशें मुखार उलयतना तांणी म्हणलें
दुसरें सत्र गौरीश वेर्णेंकार हांच्या अध्यक्षताये खाला जालें. ह्या सत्रांत गोंय, कर्नाटक, केरळ ह्या वेगळ्यावेगळ्या राज्यांतल्या कवींनी आपल्यो चारोळ्यो सादर करून कार्यावळीक खूब रंगत हाडली. हातूंत वट्ट 62 कवींनी वांटो घेतलो. दर एका कवीक शाल आनी मानचिन्न भेटोवन भोवमान केलो. योगिता वेर्णेंकार हांणी चारोळीचेर खोलायेन समालोचन केलें.
उक्ती माची ह्या तिसर्या सत्रांत सुमार धा नव्या कवींनी आपापल्यो चारोळ्यो सादर केल्यो. ह्या सत्रांत जॉन आगियार अध्यक्ष म्हूण जाल्यार संयोजक संदेश बांदेकार माचयेर हाजीर आशिल्ले.
ह्या कार्यावळीची सांगता गुरुदास नाटेकार हांचे अध्यक्षताये खाला समारोप सुवाळ्यान जाली. ह्या वेळार गुरुदास नाटेकार हांच्या हातांतल्यान शाळेच्या भुरग्यांक प्रमाणपत्रां भेटयलीं.
शीतल साळगांवकार हांणी सगल्यांचे उपकार आठयले जाल्यार कार्यावळीचें पुराय सुत्रसंचालन अनघा कामत हांणी केलें. सभाघराची आकर्शक सजावट अविनाश कुंकळकार हांणी केली. निलबा खांडेकार, सुनील पालकार, निता कुट्टीकार, जॉन आगियार हांणी कार्यावळ येसस्वी करपा खातीर खर कश्ट घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
