भांगरभूंय | प्रतिनिधी
नवी दिल्ली, खबरां संस्था: सर्वोच्च न्यायालयान कर्नाटक हायकोर्टाचे न्यायाधीश वी श्रीशानंद हांचे आडची सुनावणी बंद केली. न्यायाधीश वी श्रीशानंद हांणी कोर्टांत सुनावणे मजगतीं केल्ल्या वादग्रस्त विधाना विशीं चूक मागले उपरांत ही सुनावणी बंद करपाचो निर्णय घेतलो. पांच न्यायाधीशांच्या खंडपीठाचें नेतृत्व करपी सरन्यायाधीश डी वाय चंद्रचूड हांणी हो निर्णय न्याय आनी न्यायवेवस्थेचे प्रतिश्ठे खातीर दिला.
हालींच न्यायालयांत जाल्ले सुनावणे वेळार न्यायमूर्ती श्रीशानंद हांणी बेंगळुरूच्या खुबश्या मुसलमान वाठारांक पाकिस्तान अशें म्हणलें. तशेंच एका बायल वकिलाक फटको दितना भितरल्या कपड्यांचो उल्लेख केल्लो. हे सुनावणेचो व्हिडियो सोशल मिडियाचेर व्हायरल जालो. हाचे उपरांत सर्वोच्च न्यायालयान कर्नाटक उच्च न्यायालयांतल्यान अहवाल मागलो आनी तो बेगोबेग सादर केलो.
भारताच्या खंयच्याच भागाक कोणूच पाकिस्तान म्हणूंक शकना अशें मुखेल न्यायाधीश चंद्रचूड हांणी सांगलें, हें देशाच्या प्रादेशीक अखंडतेक पुरायपणान आड आसा.
सर्वोच्च न्यायालयान हे विशीं दखल घेतली. ह्या वादग्रस्त निवेदना विशीं तांणी कर्नाटक उच्च न्यायालयांतल्यान अहवाल मागला. न्यायमूर्ती एस खन्ना, बीआर गवई, एस कांत आनी एच रॉय हांचे सयत सरन्यायाधीश डीवाय चंद्रचूड हांच्या नेतृत्वाखाला पांच न्यायाधीशांच्या खंडपीठान २० सप्टेंबराक घटनात्मक न्यायालयाच्या न्यायाधीशां खातीर तांच्या टिप्पण्यां विशीं स्पश्ट मार्गदर्शक तत्वां स्थापन करपाची गरज उक्तायल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
