भांगरभूंय | प्रतिनिधी
पणजी ः गोंयांत गुंतवणूक करपी उद्देजकांक आमी येवकार दितात. पूण तांणी प्रकल्पाची येवजण करतना थळाव्यांक रोजगार कसो मेळटलो हाचो विचार करचो. गरज पडल्यार तांकां कुशळटाय आनी हेर तंत्रीक प्रशिक्षण दिवचें अशें मत उद्देग मंत्री मॉविन गुदिन्हो हांणी उक्तायलें. सीआयआय वतीन बुधवारा पणजेत आयोजीत केल्ले परिशदेंत ते उलयताले. ह्या वेळार सचीव स्वेतिका सचन, स्वाती साळगांवकार, डॉ. एन विनोद कुमार आनी हेर हाजीर आशिल्ले.
गोंयांत उद्देजकांक बऱ्यो मुळाव्यो सुविधा आसात. दोन विमानतळ, म्हामार्ग, बंदरां, सैम, जिणे पद्दत अशो वेगवेगळ्यो गजाली उद्देजकांक आकर्शीत करतात. जायते फावटीं उद्देजक गोंयांत प्रकल्प हाडटात. उपरांत तांकां कळटा की गरजेचें मनीसबळ गोंयांत मेळना. हाका लागून ते भायल्या राज्यांनी जायरात करतात. हाचो उद्देजकांचेर तशेंच सरकाराचेर वायट परिणाम जाता अशें गुदिन्हो हांणी सांगलें.
हाका लागून व्हड प्रकल्प फकत राज्या भायल्या लोकांक रोजगार दिवपा खातीर गोंयांत येतात अशो समज निर्माण जाता. हें टाळपा खातीर गोंयांत प्रकल्पाची येवजण करचे पयलीं वा ताचो डीपीआर करतना थळाव्या लोकांक रोजगार कसो मेळटलो हाचो विचार करचो. गरज पडल्यार थळाव्या लोकांक तंत्रीक आनी कुशळटाय उदरगतीचें प्रशिक्षण दिवचें अशेंय गुदिन्हो हांणी सांगलें.
राज्यांतलें उद्देगीक क्षेत्र थळाव्या तरणाट्यां खातीर आसा. हाका लागून राज्यांत रोजगार निर्माण जातलो. राज्याचे अर्थीक उदरगतींत ताचो फायदो जातलो. असो विस्वास उद्देजकांनी निर्माण करपाक जाय. उद्देगांक शक्य तितली मजत दिवपाक सरकार तयार आसा. ताका लागून उद्देजकांनीय वेगळे तरेन विचार करपाची गरज आसा अशें गुदिन्हो हांणी स्पश्ट केलें.
उद्देगीक वसणुकेंत कामगारांक रावपाची सुविधा
केंद्र सरकार नवे नेम हाडपाचें आसा. हाचे प्रमाण उद्देगीक वाठारांतल्या कामगारांक त्या वाठारांत रावपाक मेळटलें. थंय नितळसाण आनी हेर मुळाव्यो सुविधा आसपाक जाय. तशेंच येवपी काळांत राज्यांतलो कायदो बदलून कामगारांक अश्यो सुविधा दिवपाचे आसात अशें गुदिन्हो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
