भांगरभूंय | प्रतिनिधी
मडगांव, प्रतिनिधी ः कुडचडें रेल्वे स्टेशना भायर दुबावीतपणान भोंवपी अजीत जेना हाका गांज्या सयत अटक केल्या उपरांत मुखेल दुबावीत अक्षय बिसवाल हाकाय ओडिसातल्यांन अटक केल्या. आतां ह्या रॅकेटांतलो तिसरो दुबावीत आनी म्हाल वांटपी रिचू महेंद्रन पिल्लय (33, आके, मडगांव) हाकाय अटक केल्या.
5 सप्टेंबराक रातच्या सुमार 8:30 वरांचेर कुडचडे रेल्वे स्टेशनाच्या भायर दुबावीतपणान भोंवपी दुबावीत अजीत कुमार जेना (मुळ कुबेरा, ओडिशा) हाका पुलिसांनी ताब्यात घेतलो. ताची तपासणी केली तेन्ना दुबाविताच्या दोन बॅगातल्यान 8.472 किलो गांजो जप्त केलो. बाजारांतल्या दरान ताचें मोल 8 लाख 47 हजार 200 रुपया आसा.
अजीताची चवकशी करतना दुबावीत हाचे आदीं चार फावटीं गांजो पुरवण करपाक गोंयांत आयिल्लो आनी ओडिसाचो एक मनीस ताका गांजो पुरवण करतालो अशें कळ्ळें. दुबावीत जेना हाका न्यायालयान अटीचेर जामीन दिला. 50 हजार जातमुचलका आनी त्याच मोलाचो हमीदार, रावपाचो पत्तो, संपर्क क्रमांक दिवन आनी परवानगी बगर गोंयांतल्यान भायर वचप ना अश्यो अटी घाल्यात.
ते उपरांत कुडचडे पुलिसांनी चवकशी फुडली चवकशी करुन दुबावीत जेना हांणी दिल्ले म्हायतीचेर आदारुन अक्षय कुमार बिसवाल (38, भद्रक, ओडिसा) हाका ओडिसाच्यान ताब्यात घेवन उपरांत अटक केली. दुबावीत अक्षय कुमार स्वता ओडिसाच्यान गोंयांत गांजो हाडटालो हें उजवाडाक आयलें. ताका न्यायालयांत हजर करुन पांच दिसांची कोठी दिल्या.
ह्या प्रकरणांत कुडचडे पुलिसांनी तिसऱ्या दुबाविताक अटक केल्या. दुबावीत रिचू महेंद्रन पिल्लय ओडिसातल्यान अमली पदार्थांचे पार्सल घेवन गोंयांत वांटतालो. हे विशीं म्हायती मेळ्ळ्या उपरांत ताका अटक केल्या. दुबाविताक न्यायालयान तीन दीस पुलीस कोठी दिल्या. गांजो पुरवण करपी रॅकेट उक्ताडार जाल्ल्यान ओडिसातल्यान गोंयांत रेल्वेंतल्यान ड्रग्साची पुरवण जाताली अशें उक्तें जालां. ह्या प्रकरणात दक्षीण गोंय पुलीस अधीक्षक सुनीता सावंत हांच्या फुडारपणा खाला कुडचडे पुलीस खोलायेन चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
