प्लास्टिकाचो वापर आडायतलो ‘पोती’ प्रकल्प

भांगरभूंय | प्रतिनिधी

गोंय कोयर वेवस्थापन म्हामंडळ, ‘अर्ज’ आनी मुरगांव पालिकेचो उपक्रम

पणजी ः गोंयभर कोयरुच कोयर दिश्टी पडटा. हालींसराक प्लास्टिकाचो वापर चड जाल्ल्यान कोयरुय चड जाता. प्लास्टिक आनी हेर कोयराक लागून सैम इबाडटा, पर्यावरणाची हानी जाता. हाकाच लागून सिंगल युज प्लास्टिकाचो वापर दिसपट्टे जिणेंत उणो करपा खातीर गोंय कोयर वेवस्थापन म्हामंडळान मुरगांव पालिका आनी ‘अर्ज’ म्हळ्यार अन्यायरहित जिंदगी ही बिगर सरकारी संस्था हांच्या सहकार्यान ‘पोती’ प्रकल्प सुरू केलो. ह्या प्रकल्पांतल्यान प्लास्टीक वापर आडावपा वांगडाच जायत्या जाणा खातीर रोजगाराची संदूय उपलब्ध जातली.

आमदार दाजी साळकार हांणी ह्या प्रकल्पाचें उक्तावण केलें. ह्या वेळार मुरगांवचे नगराध्यक्ष गिरीश बोरकार, नगरसेविका शमी साळकार, नगरसेवक दिलीप बोरकार, गोंय कोयर वेवस्थापन म्हामंडळाचे महावेवस्थापक नंदन प्रभुदेसाय हाजीर आशिल्ले. एचक्यू हॉटेल, प्रेझेंटेशन सोसायटी आनी वास्को लीगल एड सेल हांणी कपड्यांच्या पोतयां खातीर पोरणे कपडे दिले.

प्लास्टिकाचो वापर आडायतलो ‘पोती’ प्रकल्प……

अशें तरेन प्रकल्प लायतले चालीक

० गोंय कोयर वेवस्थापन म्हामंडळ दितले कियोस्क.
० पालिकेन वास्को फिश मार्केटांत प्रकल्पा खातीर सुवात दिल्या.
० ‘अर्ज’ संस्थे कडेन पोरणें कपडे एकठांय करुन पोतयो दिवपाची जापसालदारकी आसा.
० ह्या प्रकल्पा खाला 4-आर (रिफ्यूज, रिसायकल, रिड्यूस आनी रियूज) हें धेरण तयार केला.
० प्लास्टीकाचो वापर टाळपा खातीर पोरणें कपड्यांचो परत वापर करतले.

देड लाख पोतयो वांटप

पोती प्रकल्पाक लागून दर वर्सा सुमार 30 हजार किलो सिंगल यूज प्लास्टिकाचो वापर आडायतले आनी 50 हजार किलो वापरिल्ल्या कपड्यांचो परत वापर जातलो. ह्या प्रकल्पाक लागून 25 बायलांक रोजगार मेळटलो. पांच म्हयन्यांत सुमार देड लाख कपड्यांच्यो पोतयो वांटून दितले. प्लास्टीक पोतयेचो चड वापर थांबवप आनी कपड्यांच्यो पोतयो फुकट वांटून पर्यावरणाची राखण करप हो ह्या ‘पोती’ प्रकल्पाचो हेत जावन आसा अशें अर्ज संस्थेची संचालक ज्युलियाना लोहार हांणी सांगलें.