भांगरभूंय | प्रतिनिधी
उंचेल्या पांवड्या वेले बसकेंत अधिकार्यांक दिले निर्देश
दिवचल: दिवचल मतदारसंघांतले वेगळेवेगळे नियोजीत प्रकल्प, येता ते प्रकल्प, पायाभूत, मुळाव्यो सुविधा, तेचबरोबर विवीध समस्या आनी विकास येवजण हाची फाटपुरवण करतना जे प्रकल्प नियोजीत आसात ते वेळार पूर्ण करात. तशेंच दरेक प्रकल्पाचें काम दर्जेदार करात अशे निर्देश मुख्यमंत्री डॉ. प्रमोद सावंत हांणी विवीध खात्याच्या अधिकार्यांक दिले.
दिवचलचे आमदार डॉ. चंद्रकांत शेट्ये हांच्या फुडाकारान दिवचल मतदारसंघांतलो विकास, समस्या, नवे प्रकल्प आदींचो नियाळ घेवपा खातीर मुख्यमंत्र्याचे हाजिरेंत विवीध खात्याच्या वरिश्ठ अधिकार्यांची उंचेल्या पांवड्या वेली बसका पणजेंत जाली.
हे बसकेंत मुख्यमंत्र्यांनी दरेक खात्यांतल्या अधिकार्यां कडेन चर्चा करून तांणी दिवचल मतदारसंघांतले विवीध प्रकल्प, नियोजीत कामां, रखडिल्लीं कामां, फुडारांतल्यो येवजण्यो हे विशीं ताकतिकेन फाटपुरवण करून जंय अडचणी येतात थंय ताकतिकेन अंमलबजावणी करात अशे तरेचे निर्देश दिले.
सरकारान खूबश्या प्रकल्पांक निधी मंजूर केला. जीं कामां उरल्यांत ती वेळार पूर्ण करपाचे निर्देेश मुख्यमंत्र्यांनी दितना सगल्या अधिकार्यांक हे विशींच्या कामांचो नियाळ आमदार डॉ. चंद्रकांत शेट्ये हाचे हाजिरेंत घेतलो.
बस स्टॅण्ड, उजो पालोवपी दळाची इमारत तशेंच नियोजीत कामां मदीं उदका स्रोत खात्या वतीन चालू आशिल्लीं खूबशीं विकास कामां, उदका प्रकल्प, वीज, उदक, रस्ते, येरादारी, बायपास रस्ते, भलायकी सेवा, उजो पालोवपी दळाची सेवा, पुलीस खात्यांतलीं कामां, रान, भौशीक बांदकाम खातें, कदंब बस सेवा ह्या सगल्या खात्यांचो विस्तारान नियाळ मुख्यमंत्री डॉ. प्रमोद सावंत आनी आमदार डॉ. चंद्रकांत शेट्ये हांणी वरिश्ठ अधिकार्यांचे हाजिरेंत घेतलो. बरें काम करपी अधिकार्यांचें तांणी अभिनंदन केलें.
खंयचींय कामां प्रलंबीत दवरूं नाकात तशेंच कामाचो दर्जोय बरो राखात. कसलेच तरेची कागाळ म्हजे कडेन येवची न्हय अशे सक्त निर्देश ह्या वेळार अधिकार्यांक मुख्यमंत्र्यांनी दिले.
लाटंबारसे हांगासरली नवी उद्देगीक वसणूक, दिवचले भव्य आनी सुसज्ज अशें भोवउद्देशी प्रशासकी संकूल, खेळां मैदान, मुळगांवां जावपी आय हॉस्पिटल, उदका शुद्धीकरण प्रकल्प, उद्देगीक वसणुकेंतल्यो समस्या हाचो तपशीलवार नियाळ मुख्यमंत्री आनी आमदार शेट्ये हांणी ह्या उंचेले बसकेंत घेतलो.
आमदार डॉ. चंद्रकांत शेट्ये हांणी मुख्यमंत्र्यांनी दिवचल मतदारसंघाच्या विकासा खातीर सेगीत सहकार्य दिलां. आयज आपलो मोलादीक वेळ दिवन सगल्या अधिकार्यां बरोबर विस्तारान नियाळ घेतिल्ले खातीर मुख्यमंत्र्यांचे विशेश उपकार आनी अभिनंदन केलें. बसकेंत विवीध खात्यांतले वरिश्ठ अधिकारी हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
