भांगरभूंय | प्रतिनिधी
कांय जाणांक मार्गदर्शक सोडाच, समजून सांगपी लेगीत मेळनात. अश्या वेळार स्वताच एक मार्गदर्शक जावन निर्णय घेता, तो वेगळो आसता.
दरेक भुरग्यां मदीं वेगवेगळी कला लिपिल्ली आसता. ती भुरग्यांनी कशी विकसीत करपाची, फुलोवपाची हाचेर मार्गदर्शकान लक्ष दिवंक जाय. जल्मा सावन मरणा मेरेन दरेक पांवड्यार वेगवेगळे मार्गदर्शक मेळटात. थोडे भुरग्यां मदलीं कला वळखून प्रोत्साहन दितात. जाल्यार कांय मार्गदर्शक आपल्या विचारांत तांकां बुडयतात.
स्वता आपलीं आवड वळखून फुडें सरता ताका येस मेळटाच अशेंय ना. कांय वेळा येस मेळटा कांय वेळा मेळना. दरेकल्या मदीं येसाचें तेंगशेर पावपाची जिद्द, उमळशीक आनी आस्त आसपाक जाय. स्वताची कला स्वता वळखप गरजेची. कांय वेळा सर्तींत वांटेकार जावन एकामेकांक कशें फाटीं वोडचें हाचेरुच चड भर दितात. मात आपली कला, आवड हाचेर भर दिवन सकारात्मक विचारांत फुडें वचपाचो कोण विचार करना म्हणल्यार अतिताय थारची ना.
जण एकल्याचे जिणेंत बरे- वायट विचारांचे लोक येतात आनी वतात. पूण त्या विचारांतले खंयचे विचार घेवचें तें आपल्या हातांत आसता. कांय वेळा अशेंय घडटा, फुडल्याच्या विचारांच्या मार्गान स्वताचोय विचार वता. अश्या वेळार मार्गदर्शकाची गरज आसता खरी, मात स्वता मार्गदर्शक जावन पांवला उखलचीं पडटात. पूण बरो मार्गदर्शक तुमकां येसाचे तेंगशेर पावोपाक सदांच प्रोत्साहन दिता. फकत आवडच न्हय तर लिपिल्लो कलाकार लेगीत जागो करता आनी अशें मार्गदर्शक मेजकेच आसात, ते चुकूनच मेळटात.
भुरगेपणांतल्यान बरें मार्गदर्शन मेळ्ळ्यार आपली आवड, कला हांची वळख जाता. मात कांय जाणांक बरे मार्गदर्शक मेळटात आनी तीं जाय त्या मार्गार पावतात. कांय जाणांक मार्गदर्शक सोडाच, समजून सांगपी लेगीत मेळनात. अश्या वेळार स्वताच एक मार्गदर्शक जावन निर्णय घेता, तो वेगळो आसता. उपरांत खंयचो मार्ग आपणावचो हाचें भान आसता. आयज फकत शिक्षणीक मळार न्हय तर दरेका मळार सर्तीं चालू आसात. मागीर नोकरेच्या आसूं वा आनी खंयच्या मळार. पूण सर्तींत वांटो घेवचोच पडटा. आवड आनी कलाय खबर ना जाल्यार सगले मार्ग भोंवून निमणें जाणवता तें म्हणल्यार खंयचे बसीर चडलो आनी खंय पावलो.
उषा झरांवकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
