भांगरभूंय | प्रतिनिधी
रविचंद्रन आश्विनान बांगलादेशा आडचे पयले टॅस्टींत जबरदस्त कामगिरी केल्ली. आयसीसीचे टॅस्ट बॉलरांचे क्रमवारींत पयले सुवातेर आशिल्ल्या 38 वर्सां पिरायेच्या आश्विनान दुसऱ्या डावांत 88 धांवड्यांनी 6 विकेटी घेवन बांगलादेशाचो दुसरो डाव 234 चेर गुठलावपाक आनी भारताक 280 धांवड्यांनी जैत मेळोवन दिवपाक मजत केल्ली. ताणें बॉलिंगे खेरीत बॅटिंगेंत लेगीत आपली चमक दाखयिल्ली. पयल्या डावांत ताणें 133 बॉलांनी 113 धांवड्यो केल्ल्यो.
पयले टॅस्टींत ताणें साबार विक्रम मोडिल्ले. आतां दुसरे टॅस्टींत लेगीत आनीक कांय विक्रम मोडपाची संद आसा. दुसरी टॅस्ट शुक्रारा सावन हांगाच्या ग्रीन पार्क स्टेडियमाचेर सुरू जातली.
आश्विनान बांगलादेशा आड अजून मेरेन खेळिल्ले सात टॅस्टींनी 29 विकेटी घेतल्यात. आदलो फास्ट बॉलर झहीर खानाक फाटीं घालपाक ताका आनी तीन विकेटींची गरज आसा. भारता वतीन बांगलादेशा आड झहीर खानान सगल्यांत चड 31 विकेटी घेतल्यात.
शेन वॉर्न (138), नॅथन लायन (119), रंगना हेराथ (115), मुथय्या मुरलीधरन (106) आनी ग्लॅन मॅकग्राथ (103) हांच्या उपरांत आश्विनाक टॅस्टीच्या चवथ्या डावांत 100वी विकेट पुर्ण करपाक फकत एके विकेटीची गरज आसा. अशें केलें जाल्यार तो भारताचो पयलो आनी संवसारांतलो सवो बॉलर थारतलो.
ऑस्ट्रेलियेचो आदलो म्हान लेग स्पिनर शेन वॉर्नाक फाटीं घालपाची लेगीत आश्विना कडेन संद आसा. शेन वॉर्नान टॅस्टीच्या एका डावांत 37वे खेपे पांच विकेटी घेतल्यात. सध्या आश्विन आनी वॉर्न जोड रितीन दुसरे सुवातेर आसा. दुसरे टॅस्टींत एका डावांत पांच विकेटी घेतल्यो जाल्यार शेन वॉर्नाक फाटीं घालून आश्विन दुसरे सुवातेर पावतलो. पयले सुवातेर श्रीलंकेचो ऑफ स्पिनर मुथय्या मुरलीधरन आसा. ताणें 67 खेपे एका डावांत पांच विकेटी घेतल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
