भांगरभूंय | प्रतिनिधी
सांखळे मतदारसंघांत ६७ बायलांक वाटलीं गृह आधार मंजुरी पत्रकां
दिवचले, प्रतिनिधी: आधुनीक गोंयांत उदरगत नेटान चालीक लागल्या. तेन्ना राज्यांतल्यो बायलो सक्षम, स्वयंपूर्ण, आत्मनिर्भर जावपाचे नदरेन विवीध मळांचेर काम करतना दिसतात. बायलां खातीर विंगड विंगड येवजण्यो डबल इंजिन सरकार राबयता. ताका लागून आयज बायलो दादल्यांच्या बरोबरीन विवीध मळांचेर कार्यरत आशिल्ल्याचें समादान आसा. दरेका हाताक काम दिवपाचो सरकाराचो यत्न आशिल्ल्यान, हातूंत महिला मंडळ आनी बायलांचें बारीक उद्देग सुरू करपाचें सपन पुराय करतले, अशें मुख्यमंत्री डॉ. प्रमोद सावंत हांणी म्हणलें.
सांखळे मतदारसंघांत सुमार ६७ बायलांक गृह आधार येवजणेचीं मंजुरी पत्रां मुख्यमंत्र्यां हस्तुकीं वाटलीं. ह्या वेळार भाजप मंडळ अध्यक्ष गोपाळ सूर्लकार, संजय नायक, सुभाष फोंडेकार, विवीध सरपंच, पंचायत वांगडी आनी हेर हजर आशिल्ले.
सांखळे मतदारसंघांतले जायत्या पंचायत विभागांत तशेंच पालिका विभागांत आयज जायत्यो बायलो उद्देजक जातात. तशेंच महिला मंडळा वरवीं एकठांय येवन बायलांनी बारी उद्देक सुरू करपांत आनी विवीध जिन्नस करपा कडेन बायलां आपली रुची दाखयतात. बाजारांत दर्रेदार खाणां उपलब्ध करपा खातीर विशेश यत्न केल्ल्यान बायलां आयज खर्यानीच सक्षम जायत चलिल्ल्याचें चित्र पळोवन समाधान दिसता, अशें मुख्यमंत्र्यान मखार म्हणलें.
केंद्र आनी राज्य सरकाराच्या सगळ्या येवजण्यांचो लाव बायलांनी घेवचो. बायलांनी सगळ्या मळांचेर मुखार सरचें. सरकार सगळे तरेच्यो येवजण्यो राबोवपाक तयार आसा, अशेंय तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
