भांगरभूंय | प्रतिनिधी
पयलींचेंच पुराय सुवाळ्या खातीर १ लाखाचें शुल्क लागू जातलें
पणजी, प्रतिनिधी : दर्यादेगेचेर जावपी लग्न सुवाळे तशेंच कार्यावळीं खातीर दिसाक १ लाख रूपया शुल्क लागू करपाचो निर्णय सरकारान फांटी घेतला. आदले भशेन आतां पुराय पांच दिसां खातीरच्या कार्यावळींक १ लाख रूपयांचें शुल्क लागू जातलें. तशेंच पांच दिसां उपरांत दर दिसा १० हजार रूपयांचें शुल्क लागू जातलें. शिक्षण संस्था, सेवा भावी संस्था, सरकारी म्हामंडळा हांकां शुल्कांत ७५ टक्के सवलत मेळटली.
दर्यादेगेचेर जावपी लग्न सुवाळे तशेंच हेर कार्यावळीं खातीर दिसाक १ लाखाचें शुल्क परवडपा सारकें ना. ही शुल्कवाड फांटी घेवपाची गरज आसा, अशी मागणी टीटीएजीचे अध्यक्ष जॅक सुखिजा हांणी केली. तांणी मागणी केल्या उपरांत बेगोबेग शुल्कवाडीचो निर्णय रद्द केला. शुल्क वाडयतना पर्यावरण खात्यान टीटीएजीक विस्वासात घेवंक ना, अशें सुखिजा हांणी स्पश्ट केल्लें.
पर्यावरण खात्यान फाटल्या बिरेस्तारा शुल्कांत बदल करपी अधीसुचोवणी जारी केल्ली. चार दिसां उपरांत लगीन सुवाळ्या खातीरची शुल्कवाड रद्द करपी अधीसुचोवणी जारी जाल्या.
दर्यादेग वाठारात घरां तशेंच हेर बांदकामां खातीर आराखड्यांत बदल करपाचो आसा जाल्यार आतां मूळ शुल्काच्या १० टक्के अतिरिक्त शुल्क फारीक करचें पडटलें. हातूंत मात कसलोच बदल जावंक ना, अशें पर्यावरण संचालक जॉन्सन फर्नांडिस हांणी सांगलें. घरांची दुरुस्ती वा नुतनीकरणा खातीर २५ हजार रुपया शुल्क आसा. आराखड्यांत बदल करपा खातीर आनीक १० टक्के म्हणल्यार २,५०० रूपया आनीक फारीक करचे पडटले. घर मोडून परतून बांदपा खातीर ३५ हजार रुपया शुल्क आसा. आराखड्यांत बदल केलो जाल्यार १० टक्के म्हणल्यार ३,५०० रुपया अतिरिक्त फारीक करचे पडटले. शॅका खातीर ७०० रुपया आनी झोपड्यां खातीर ४०० रुपया शुल्क आसा. आराखड्यांत बदल करपा खातीर शॅकाक ७० रूपया आनी झोपड्यांक ४० रुपया फारीक करचे पडटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
