भांगरभूंय | प्रतिनिधी
मडगांव : गोंयांत सेगीत पडपी उटंगाराच्या पावसाचो फटको साश्टी म्हालाक बरोच नेटान बसला. हांगच्या विवीध वाठारांतल्या रस्त्यांचेर उदक सांठून उरिल्ल्या ताचो परिणाम येरादारीचेर दिसून आयलो. तशेंच वेर्णेच्यान लोटले वचपी रस्त्यार पालसणां कोसळ्ळीं. तशेंच वेर्णा सावन लोटले वचपी म्हामार्गाचेर पालसणां कोसळपाची घडणूक मंगळारा सकाळीं घडली. हाका लागून दक्षीण गोंय जिल्लो प्रशासना वतीन एके वटेनची येरादारी बंद दवरली. पुलीस, उजो पालोवपी दळाचे जवान घडणुके सुवातेर दाखल जाले. उपरांत जेसीबी वरवीं फातर आनी माती काडली आनी सुमार तीन वरांनी रस्तो येरादारी खातीर उक्तो केलो.
घोग्यांनी पडपी पावसाक लागून मडगांव सयत साश्टी वाठारांत उदक सांठून राविल्लें दिसलें. रस्त्त्याचेर फोंडकुलां आनी तातूंत उदक सांठून उरिल्ल्यान वाहनचालकांक बरेच त्रास सोंसचे पडले. मडगांवच्या दक्षीण गोंय जिल्लो हॉस्पिटलाच्या मुखेल प्रवेशदाराचेर उदक सांठून उरिल्लें. हाका लागून दुयेंती सयत ताच्या सोयर्यांक उदकांतल्यान वाट काडीत वयचें पडटालें.
बोर्डा, आर्ले सर्कला कडेन तशेंच भोंवतणच्या वाठारांत आनी मडगांव, केपें रस्त्यार, नावेली शांतीनगरा कडेन वचपी रस्त्यार व्हडा प्रमाणांत उदक सांठून उरिल्लें. तातूंततच ह्या जंक्शनाचेर फोंडकुलां पडिल्ल्यान चालकांनी आनी चलून वचप्यांक त्रास सोंसचे पडले. दवर्लीचेय रस्ते उदका पोंदाक गेल्ले.
मजगतीं, साश्टींतल्या चडश्या शेतकारांनी पावसाच्या पयलींच भातलावणी केल्ली. ताका लागून आतां २० दिसांनी भाताची कापणी करची पडटली. अशी स्थिती असतनाच सध्या घोग्यांनी पडपी पावसाक लागून शेतांचें लुकसाण जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
