भांगरभूंय | प्रतिनिधी
पेडणें, प्रतिनिधी: पुराय गोंयभर उटंगराचो पावस झडटा आसतनाच पेडणें पालिकेन मात पालिका वाठारांत आडनदर केल्या. हाका लागून जायत्यो समस्या निर्माण जातना दिसतात. सध्या घोग्यांनी पडपी पावसाक लागून हांगच्या नुस्तें बाजारांत उदक सांचून उरिल्ल्यान नुस्तें विक्रेत्यांक बसपा खातीर सुरक्षीत सुवात ना. तशेंच धोपरभर उदकांतल्यान गिरायकांक नुस्तें व्हरपा खातीर बाजारांत येवचें पडटा. हे समस्ये कडेन पेडणें पालिकेन लक्ष दिवन पावस गेले उपरांत तरी फुडाराक परत पावसाचें उदक ह्या नुस्तें बाजारांत सांठून उरचें ना हाची जतनाय घेवची आनी तसो उपाय काडचो अशी मागणी नागरिकांनी केल्या.
पेडणें पालिका मंडळ उदरगतीच्या कामा कडेन आडनदर करता. ज्यो समस्या मुखार येतात, ताचे कडेनूय लक्ष दिना. पावसा पयलींचीं कामां वेळार करूंक नाशिल्लयन ताचें परिणाम आतां दिसून येतात.
हांगच्या नुस्त्या बाजारांत फाटल्या कितल्याशाच वर्सां सावन व्हडा प्रमाणांत उदक सांठून उरता. हें उदक भायर काडपा पालिका मंडळाक अपेस आयलां. उदरगतीच्या कामांचेर केल्लो खर्च आनी त्या कामांची तपासणी जायना, ताका लागून असल्यो गजाली घडटात. पालिका नुस्तें विक्रेत्यां कडल्या सोपो कर वसूल करतात. मात तांकां ज्यो समस्या सतायतात त्यो पालिका पयस कित्याक करिना? असो प्रस्न नागरिकांनी उक्तायला.
आमी नुस्तें विकतना आमकां पावसांत खुबश्या समस्यांक तोंड दिवचें पडटा. ह्या पावसाक लागून आमकां सुरक्षीत मार्केट तरी उपलब्ध करून दिवचें. अशी मागणी आमी करीत आसतात. मात आमच्या मागण्यां कडेन आडनदर जाता अशी तिडक नुस्तें विक्रेत्यांनी उक्तायली.
पेडणे पालिकेचे नगराध्यक्ष शिवराम तुकोजी हांचे कडेन संपर्क केलो तेन्ना नुस्तें मार्केटांत कशे तरेन उदक सांठून उरता? तें उदक खंय आडकून उरता? उदक कित्याक भायर वचना? हाचेर आमी बेगोबेग दखल घेतले आनी ताचेर उपाय काडटले अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
