भांगरभूंय | प्रतिनिधी
नवी दिल्ली, खबरां संस्था ः हालींसराक यूपीआय पेमेंट सगळींच वापरतात. रस्त्यार बसपी विक्रेत्या सावन ते मॉलांतल्या शोरूमा मेरेन पेमेंट करपा खातीर क्यूआर कोड सगळेकडेन आसता. मोबायलांत यूपीआय पेमेंट अॅप उगडून कोड स्कॅन करुन पासवर्ड घाल्या उपरांत रोकडोच पेमेंट पुराय जाता. पूण फाटल्या कांय दिसां सावन अशा यूपीआय ट्रान्झॅक्शन्साचेर अधिभार (Surcharge) लायतले अशीं चर्चा सुरू आसा. तशें जाल्यार कितें जातलें? हें विशीं केल्ल्या सर्वेक्षणाचे निश्कर्श मुखार आयल्यात.
बिझनेस स्टँडर्डाच्या खबरां प्रमाण हें सर्वेक्षण ‘लोकलसर्कल्स’ नांवाचे संस्थेन 15 जुलय ते 20 सप्टेंबर मेरेन केल्लें. हाचे प्रमाण सुमार 38 टक्के गिरायक आपले 50 टक्के वेव्हार डेबिट, क्रेडीट कार्ड वा हेर खंयच्याय माध्यमांतल्यान करचे परस यूपीआय पेमेंट वरवीं करतात. देशभरांतल्या 308 जिल्ह्यांतल्यान 42 हजार लोकांनी ह्या सर्वेक्षणांत वांटो घेतिल्लो. पूण दर एका प्रस्नाक लोकांनी दिल्ल्यो जापो वेगवेगळ्यो आशिल्ल्यो. यूपीआयवेलो सरचार्ज हो हेर प्रस्नांतलो एक प्रस्न आशिल्लो आनी ताका 42 हजारांतल्या 15,598 जाणांनी जाप दिली.
ह्या सर्वेक्षणांत वांटो घेतिल्ल्या 75 टक्के यूपीआय पेमेंट वापरप्यांनी सांगलें की हो सरचार्ज लायल्यार यूपीआय पेमेंट सुविधा वापरप बंद करतले. विशेश म्हळ्यार वट्ट वापरपी वांटो घेवप्यां मदल्या फकत 22 टक्के लोकांनी अशें सरचार्ज लायल्यार हरकत ना अशें सांगलें.
10 मदले 4 गिरायक यूपीआय वापरतात…
ह्या अहवाला प्रमाण दर 10 गिरायकांतले 4 गिरायक यूपीआय पेमेंट वापरतात. देखून ह्या वेव्हारांचेर सरचार्ज लावपाच्या प्रस्तावाक खर विरोध आसा. देखून लोकलसर्कल्स ह्या सर्वेक्षणाचे निश्कर्श केंद्रीय अर्थ मंत्रालयाक सादर करतले, जाका लागून हे संबंदी कसलोय निर्णय घेवचे पयलीं कोटी युपीआय वापरप्यांच्या विचारांचो विचार जातलो अशें अहवालांत म्हणलां.
मजगतीं, नॅशनल पेमेंट कॉर्पोरेशन ऑफ इंडियाच्या म्हणण्या प्रमाण फाटल्या वर्साच्या तुळेंत 2023- 24 अर्थीक वर्सा यूपीआय वरवीं केल्ल्या पेमेंटाची रक्कम विक्रमी 57 टक्क्यांनी वाडल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
