भांगरभूंय | प्रतिनिधी
मुंबय, खबरां संस्था: हालींच आंध्र प्रदेशांतल्या तिरुपती बालाजी देवळांतल्या लाडवांनी वापरतात त्या तुपांत जनावरांची चरबी मेळिल्ल्याचें उक्ताडार येता थंयच आसा. आतां मुंबयच्या नामनेच्या श्री सिद्धिविनायक देवळांतल्यान एक अजाप करपा सारकी गजाल मुखार आयल्या. सिद्धिविनायक देवळाच्या प्रसादांत हुंदराचीं पिलां सांपडलीं. सोशल मिडियाचेर हे घडणुकेचो व्हिडिओ बरोच व्हायरल जाले उपरांत देवळाच्या वाठारांतले नितळसाणेचेर प्रस्न उप्रासला.
प्रसादाच्या पाकिटांचेर हुंदरान काडलीं पिलां
मुखार आयिल्ल्या व्हिडिओ प्रमाण, सिद्धीविनायक प्रसादाच्या पाकिटांचेर हुंदराचीं पिलां दिसतात. लाडवांच्या प्रसादाच्या पोतयांनीच हुंदरान पिलां काडल्यांत. प्रसादाचे लाडू हुंदरांनी खाल्ल्याचोय आरोप जाता. मजगतीं, सिद्धिविनायक मंदिर ट्रस्टान हे आरोप न्हयकारल्यात.
मुखार आयिल्लो व्हिडीओ देवळाच्या वाठारांतलो न्हय. हाचे फाटल्यान कोणाचें तरी कारस्थान आसा. कोणेंतरी प्लॅस्टिकांत हुंदीर घालून ते प्रसादांत दवरले आनी ताचो व्हिडिओ काडला आसतलो, अशें सिद्धिविनायक देवूळ ट्रस्टचे अध्यक्ष सदा सरवणकर हांणी सांगलें. तशेंच देवळा भोंवतणी सदांच नितळसाण आसता अशेंय तांणी म्हणलें.
हे विशीं चवकशी जातली, अशें सुधीर मुनगंटीवार हांणी सांगलें. देवळाचें प्रशासनूय घडिल्ल्या प्रकाराची तपासणी करतलें आनी योग्य तें स्पश्टीकरण दितलें. तशेंच व्हायरल फोटवांची आनी व्हिडिओचीय तपासणी जातली अशें तांणी सांगलें.
सद्दां करतात ५० हजार लाडू
सिद्धिविनायक देवळांत सदांच सुमार ५० हजार लाडू तयार करतात. प्रसादाच्या एका पाकिटांत दरेकी ५० ग्रॅमचे दोन लाडू आसतात. परबां वेळार प्रसादाची मागणी वाडटा. प्रयोगशाळेच्या तपासणी अहवाला प्रमाण, हे लाडू सात ते आठ दीस सांठोवन दवरूं येतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
