भांगरभूंय | प्रतिनिधी
मुंब्रा, खबरां संस्था: बदलापूरचे एके नामनेचे शाळेंत दोन भुरग्यांचेर लिंगीक अत्याचार जाल्ल्यान पुराय महाराष्ट्र पेटिल्लें. त्या दोगाय सान चलयांचेर अत्त्याचार करपी आरोपी अक्षय शिंदे हो पुलीस बंदखणींत आशिल्लो. मात सोमारा सांजेवेळार अक्षय शिंदेक पुलिसांचे फारपेटींत मरण आयलें. मुंब्रा मार्गाचेर पुलीस वाहनांतूच जाल्ले फारपेटींत अक्षय शिंदे हाका मरण आयलें.
मजगतीं, ह्या वेळार सहाय्यक पुलीस निरीक्षक नीलेश मोरे हांच्या पांयाक गोळी लागून ते जखमी जाले. अक्षय हांणी एका पुलीस अधिकार्याचें पिस्तोल काडून घेवन तीन फार मारिल्ल्याचो दावो पुलिसांनी केला. उपरांत पुलिसांनी फारपेट केल्ल्यान अक्षयाक मरण आयलें. ज्या पुलीस अधिकार्यान मारिल्ल्या फाराक लागून अक्षयाक मरण आयलें तांणी नामनेचे फारपेट फेम अधिकारी प्रदीप शर्मां हांचे वांगडा काम केल्लें, अशी म्हायती मेळ्ळ्या.
अक्षय शिंदेचेर फार मारपी तो अधिकारी कोण?
ठाणे मध्यवर्ती गुन्यांव अन्वेशण फांट्याचे पुलीस निरीक्षक संजय शिंदे हांणी अक्षयाचेर फार मारिल्ल्याचें कळ्ळां. मात, पुलिसांच्या प्रसिद्धी पत्रकांत तांचो उल्लेख जावंक ना. संजय शिंदे हांणी ह्या पयलीं ठाणे पुलिसांच्या गुन्यांव विभागांत खंडणी विरोधी पंगडांत काम केलां. ह्या पंगडाचें नेतृत्व नामनेचे फारपेटफेम अधिकारी प्रदीप शर्मा हांणी केल्लें. दाऊद इब्राहिमचो भाव इकबाल कासकराक अटक करपी पुलिसांचे टिमींत तांचो आसपाव आशिल्लो.
मजगतीं, त्या सान पिरायेच्या दोन चलयांचेर आयिल्लो प्रसंग आयकून बदलापूरांतल्या लोकांक धक्को बशिल्लो. भुरग्यांक न्याय मेळोवन दिवपा खातीर लोक रस्त्यार देंविल्ले. गुन्यांवकाराक फांसार चडोवचो असोय उलो लोकांनी मारिल्लो. तशेंच शाळे भायर लोकांनी, पालकांनी निशेध केल्लो, रेल्वेय आडयल्ली. ह्या प्रकरणांत शाळेनूय चूक मागिल्ली. शाळेच्या मुख्याध्यापकाक निलंबीत केल्लो. तशेंच भुरग्यांची जापसालदारकी आशिल्ल्या दोग सेविकांक नोकरेंतल्यान काडिल्लीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
